ޓޫރިސްޓް ރިސޯޓުތައް ހެދުމަށް ދޫކޮށްފައިވާ ރަށްތަކާއި ބިންތަކުގެ މުއްދަތު އިތުރުކުރަން ފީ ދެއްކުމުގެ މުއްދަތަށް ބަދަލުތަކެއް ގެންނަން ޓޫރިޒަމާ ބެހޭ ގާނޫނަށް ސަރުކާރުގެ ފަރާތުން އިސްލާހު ހުށަހެޅުއްވީ ދަނގެތި ދާއިރާގެ ޕީއެންސީގެ މެންބަރު އަބްދުﷲ ރަޝީދެވެ.
ކޮމިޓީ ފެށުމާއެކު ފުނަދޫ ދާއިރާގެ މެންބަރު މުހައްމަދު މަމްދޫހު ހުށަހެޅުއްވީ ސަރުކާރުން ހުށަހަޅާފައި އޮތް ގޮތަށް އިތުރު ބަދަލެއް ގެނައުމަކާ ނުލައި ބިލު ފާސްކުރުމަށެވެ.
އެހެންކަމުން އިތުރު ބަހުސަކަށް ނުގޮސް އިސްލާހު ކޮމިޓީން ފާސްކުރުމަށް އޭނާ ހުށަހެޅުއްވި އެވެ. މަމްދޫހުގެ މި ހުށަހެޅުމަށް ތާއީދުކުރެއްވީ ބާރަށު ދާއިރާގެ މެންބަރު އިބްރާހީމް ޝުޖާއު އެވެ.
ނަމަވެސް އިދިކޮޅު އެމްޑީޕީގެ ޕީޖީ ލީޑަރު ހިތަދޫ ދެކުނު ދާއިރާގެ މެންބަރު އިބްރާހިމް ނާޒިލް ވަނީ މި ބިލްގެ މަސައްކަތް އެހާ އަވަސް އަރުވާލައިގެން ކުރިއަށް ގެންދާ ސަބަބާ ގުޅޭ ގޮތުން ސުވާލު ކުރައްވައިފަ އެވެ.
ނާޒިލް ވިދާޅުވީ ވަރަށް އަވަސްކޮށް ބިލްގެ މަސައްކަތް ކުރިއަށް ގެންދާ މަގުސަދު އެނގެން ބޭނުންވާ ކަމަށާއި އަދި މި ބިލްގެ ސަބަބުން މުސްތަގުބަލަށް ކުރާނެ ހެޔޮ އަސަރަކީ ކޮބައިކަން ސާފުވާން ވެސް ބޭނުންވާ ކަމަށެވެ.
ނާޒިލްގެ އެވާހަކަތަކާ ގުޅިގެން އަބްދުއްރަހީމް ވިދާޅުވީ ކުރިއަށްދަނީ ކޮމިޓީގެ މަސައްކަތް ކަމަށާއި ރިޔާސަތުން މުގައްރިރެއްގެ ހައިސިއްޔަތުން އެ ސުވާލަށް ޖަވާބުދާރީވާން ޖެހޭނެ ކަމަށް ގަބޫލު ނުކުރައްވާ ކަމަށެވެ.
ނާޒިލު ފިޔަވައި ބިލަށް ބަހުސްކުރެއްވީ ވެރިކަންކުރާ ޕީއެންސީއަށް ނިސްބަތްވެވަޑައިގަންނަވާ މައްޗަންގޯޅީ އުތުރު ދާއިރާގެ މެންބަރާއި ފޭދޫ ދާއިރާގެ މެންބަރެވެ. ދެ ބޭފުޅުންވެސް ވާހަކަދެއްކެވީ ސަރުކާރުން ހުުށަހެޅި ގޮތަށް ބިލު ފާސްކުރުމަށެވެ.
ކޮމިޓީގެ ބަހުސަށް ފަހު، އެ ބިލް އޮތް ގޮތަށް އެއްވެސް އިސްލާހެއް ނުގެނެސް މަޖިލީހުގެ ތަޅުމަށް ފޮނުވަން މުޅި މަޖިލީހުގެ ކޮމިޓީގައި ބައިވެރިވެވަޑައިގެންނެވި 76 މެންބަރުން ވޯޓު ދެއްވި އެވެ.
މި އިސްލާހުގައިވާ ގޮތުން ރިސޯޓުތައް ކުއްޔަށް ދޫކޮށްފައިވާ މުއްދަތު އިތުރުކުރަން ފައިސާ ދައްކަން ދޭ މުއްދަތު ދެ އަހަރުން ހަ މަހަށް ކުޑަ ވެގެންދާނެ އެވެ. އެގޮތުން މި އިސްލާހަށް އަމަލުކުރަން ފެށުމުން ހަ މަސް ދުވަހުގެ ތެރޭގައި ފަސް މިލިއަން ޑޮލަރު ދައްކައިފި ނަމަ ކުލި މުއްދަތު އިތުރުކޮށްދޭނެ އެވެ. އޭގެ ފަހުން ނަމަ 10 މިލިއަން ޑޮލަރު ދައްކަން ޖެހެ އެވެ.
ހަމަ އެއާއެކު ރަށް ނުވަތަ ބިން ކުއްޔަށް ހިފާފައިވާ ފަރާތުން ސަރުކާރަށް ދައްކަންޖެހޭ އެއްވެސް ކުއްޔެއް، ޖޫރިމަނާއެއް، ޓެކުހެއް ނުވަތަ ފީއެއް ވާނަމަ އެ ފައިސާ ދައްކާ ހަލާސްކުރަންވާނެ އެވެ. އޭގެ ތެރޭގައި އެއްބަސްވުމެއްގެ ދަށުން ޓޫރިޒަމް މިނިސްޓްރީން ފާސްކޮށްދީފައިވާ ކުއްޔާއި ޖޫރިމަނައެއް ނުހިމެނޭނެ ކަމަަށް އިސްލާހުގައި ބުނެފައިވެ އެވެ.
މި ފުރުސަތު ދޭން ނިންމީ މިހާރު އަމަލުކުރަމުންދާ ގާނޫނުގައި ފަސް މިލިއަން ޑޮލަރު ދައްކައިގެން ރިސޯޓުތައް ކުއްޔަށް ދީފައިވާ މުއްދަތު އިތުރުކުރަން ލިބޭ ފުރުސަތު މި އަހަރުގެ ޑިސެމްބަރުގެ ނިޔަލަށް ހަމަވާތީ އެވެ.
