3.5 މިލިއަން ރުފިޔާއަށް، ޒިފްލީނާ ބައްލަވައިގަތީ އެފްޑަބްލިއު ރެޒިޑެންސްގެ ފްލެޓެކެވެ. އެ ފްލެޓް އޭނާއަށް މިލްކުކޮށްދީ، ސިވިލް ކޯޓުން ކޮށްފައިވާ ހުކުމްގައިވާ 3.5 މިލިއަން ރުފިޔާގެ މި ފްލެޓަކީ 1،200 އަކަފޫޓްގެ ފްލެޓެކެވެ. ފްލެޓްގެ އަގަށްވާ ފައިސާ ޒިފްލީނާގެ ފަރާތުން އެޗްޑީސީ އަށް ދައްކާފައިވާތީ އެ ފްލެޓް އޭނާ އަށް މިލްކުކޮށްދީ، އެ ފްލެޓްވަނީ އޭނާގެ ނަމަށް ކޯޓު މެދުވެރިކޮށް ބަދަލުކޮށްފަ އެވެ.
އެ މައްސަލަ ފުލުހުންނަށް ހުށަހެޅުމުން ކޮރަޕްޝަންގެ މައްސަލަތައް ތަހުގީގު ކުރުމުގެ އިހުތިސާސް އޮންނަނީ އޭސީސީ އަށް ކަމަށް ވާތީ އެ މައްސަލަ ފުލުހުން އޭސީސީއަށް ހުށަހެޅީ މިދިޔަ ޖުލައި 14 އިގަ އެވެ. އެކަން ބެލުމަށް ފަހު އޭސީސީން ނިންމާފައިވަނީ ދައުވާ ކޮށްދިނުމާ މެދު ގޮތެއް ނިންމުމަށް ޕީޖީ އޮފީހުގެ ޑިއުޓީ ޕްރޮސިކިއުޝަނަށް ހުށަހަޅަން ކަމަށްވަނީ މައުލޫމާތު ލިބިފަ އެވެ.
ފްލެޓް ކަންތަކާ ގުޅޭ ގޮތުން ޒިފްލީނާ އޭނާގެ ފޭސްބުކްގައި ކުރެއްވި ޕޯސްޓެއްގައި ވިދާޅުވީ، ފްލެޓެއް ބައްލަވައިގަތީ މިދިޔަ ސަރުކާރުގައި މަގާމުގެ ލިބިވަޑައިގަތުމުގެ ކުރިން ކަމަށާއި އެ ތަނުގައި ދިރިއުޅުއްވާތާ އެތައް އަހަރެއް ވެފައިވާ ކަމަށެވެ.
ޒިފްލީނާ ވަނީ ކުރީގެ ސަރުކާރުގައި ޖެންޑާ މިނިސްޓްރީގެ ސްޓޭޓް މިނިސްޓަރުކަމުގެ އިތުރުން އެމްޑީޕީގެ ބައެއް މަގާމުތައް ވެސް އަދާ ކުރައްވައިފަ އެވެ. އެންމެ ފަހުން ބޭއްވި ރައްޔިތުންގެ މަޖިލީހުގެ އިންތިހާބުގައި އެމްޑީޕީގެ ޓިކެޓްގައި އޭނާ ތިނަދޫ ދެކުނު ދާއިރާ އަށް ވެސް ވާދަކުރެއްވި އެވެ.
