މިނިސްޓަރު ފައިސަލް މިފަދައިން ވިދާޅުވީ ދައުލަތުގެ މީޑިއާ ޕީއެސްއެމްގެ "ރާއްޖެ މިއަދު" ޕްރޮގްރާމުގައެވެ.
ފައިސަލް ވިދާޅުވީ، ރިސޯޓު މުވައްޒަފުންނަށް ރައީސް ޑރ. މުހައްމަދު މުއިއްޒު ވެވަޑައިގެންނެވި އެންމެ މުހިންމު އެއް ވައުދަކީ ބޯހިޔާވަހިކަމުގެ ވައުދުކަމަށާއި، މި 5 އަހަރު ނިމުމުގެ ކުރިން އެމަނިކުފާނު އެ ވައުދު ފުއްދަވާނެކަމަށެވެ.
ރިސޯޓު މުވައްޒަފުންނަށް ބޯހިޔާވަހިކަން ފޯރުކޮށްދޭނީ މިހާރު ކުރިއަށްގެންދާ ހައުސިން މަޝްރޫއުގެ ތެރެއިން ކަމަށްވެސް ފައިސަލް ވިދާޅުވި އެވެ.
ފަތުރުވެރިކަމުގެ ދާއިރާގައި އެތައް އަހަރެއް މަސައްކަތްކޮށްފައި ތިބި ވަރަށް ގިނަ ފަރާތްތައް ތިބި ނަމަވެސް މިހާރު ލިބެނީ އެ ފަރާތްތަކަށް ހައްގުވާ މިންވަރު ނޫންކަމަށް ފައިސަލް ވިދާޅުވި އެވެ.
އެހެންވެ، ރިސޯޓު މުވައްޒަފުންނަށް ބޯހިޔާވަހިކަން ފޮރުކޮށްދެވިއްޖެނަމަ، އެއީ ދިވެހި ސަރުކާރަކަށް އެ ފަރާތްތަކަށް ކޮށްދެވޭނެ އެންމެ މުހިންމު އެއް ކަންތައް ކަމަށް މިނިސްޓަރު ވިދާޅުވި އެވެ.
