ނިޒާރި މިހެން ވިދާޅުވީ އައްޑޫ ސިޓީ ބްރޭންޑެއްގެ ގޮތުގައި ތަރައްގީކޮށް ޕްރޮމޯޓު ކުރުމަށް "ޑެސްޓިނޭޝަން އައްޑޫ 2024" ގެ ނަމުގައި ބޭއްވި ސަމިޓު ފެށުމުގެ ރަސްމިއްޔާތުގައި ވާހަކަ ދައްކަވަމުންނެވެ.
މޭޔަރު ވިދާޅުވީ އައްޑު އަކީ ޓޫރިޒަމް ތަރައްގީކޮށް، ފުޅާކޮށް ކުރިއެރުވިދާނެ ކިތަންމެ ވަސީލްތަތެކެއް ހުރި ތަނެއް ކަމަށެވެ. ހާއްސަކޮށް އިންސާނީ ވަސީލަތްތަކަށް ބަލާ އިރު، އައްޑު އަކީ ޓޫރިޒަމް ދާއިރާގެ އެތައް ރޮނގަކުން ގާބިލު އަދި ތަޖުރިބާ ހުރި އެތައް ބަޔަކު ނިސްބަތްވާ ސިޓީއެއް ކަމަށް ވިދާޅުވި އެވެ.
އަދި މި ބިމުގެ ގޮތުން ވެސް އައްޑު އަކީ މިހާރު ޓޫރިޒަމަށް ވަރަށް ފަހިކޮށް އޮތް ކަމަށް މޭޔަރު ވިދާޅުވި އެވެ.
ނިޒާރު ވިދާޅުވީ "ޑެސްޓިނޭޝަން އައްޑޫ" ސަމިޓުގެ މަގުސަދަކީ މާޔޫސް ކަމެއް ނެތި، އައްޑޫގައި ޓޫރިޒަމް ކުރިއެރުވުމުގެ ކަންތައް ކަމާ ގުޅުން ހުރި ފަރާތްތަކާ އެކު ކުރުން ކަމަށެވެ. މޭޔަރު އިތުރަށް ވިދާޅުވީ މި ސަމިޓުގެ ދަށުން ވަރަށް ގިނަ ކަންތައްތަކެއް ކުރަން ނިންމަވާފައިވާ ކަމަށެވެ.
ނިޒާރު ފާހަގަކުރެއްވި ގޮތުގައި އައްޑު އަކީ ރާއްޖޭގެ އެހެން ތަންތަނާ ހިލާފަށް ސަރުކާރުން ޕްރޮޕަޓީތަކެއް ގާއިމުކޮށްފައިވާ ތަނެކެވެ. އޭގެ ތެރޭގައި ކެނަރީފް ރިސޯޓާއި ޝަންގްރިއްލާ ރިސޯޓް ފާހަގަކުރެއްވި އެވެ.
އަދި މިހާރު ހަންކެޑެ އިިންޓަގްރޭޓެޑް ޓޫރިޒަމް ތަރައްގީ ކުރަނީ ވެސް ސީދާ ސަރުކާރުގެ ފަރާތުން ކަމަށް މޭޔަރު ވިދާޅުވި އެވެ. ނަމަވެސް މިއީ އަމިއްލަ މީސްމީހުން އިންވެސްޓްކުރަންވީ ދާއިރާއެއްކަން މޭޔަރު ފާހަގަކުރެއްވި އެވެ.
ޑެސްޓިނޭޝަން އައްޑޫ ސަމިޓު ބޭއްވުމުގެ އެންމެ ބޮޑު މަގުސަދަކީ އެންމެން ގުޅިގެން އައްޑޫގެ ޓޫރިޒަމް ޕްރޮމޯޓްކުރަން ބްރޭންޑެއް ވުޖޫދުކޮށް، އެއާ އެއްގޮތަށް ޓޫރިޒަމް ދާއިރާ ކުރިއަރުވަން މަސައްކަތްތައް ކުރުމެވެ.
- އިތުރަށް ކިޔާލަން: އައްޑޫގެ ޓޫރިޒަމް އިނގިރޭސި މާކެޓަށް ޕްރޮމޯޓު ކުރަނީ
އައްޑޫ ސިޓީއަކީ ބިން ބޮޑު، އަތޮޅެކެވެ. ނަމަވެސް މިހާތަނަށް އައިއިރު ޓޫރިޒަމަށް ކަނޑައަޅާފައިވާ ބިންތަކެއް އޮތް ނަމަވެސް ޓޫރިޒަމް ފުޅާކުރުމުގެ މަސައްކަތް އަމަލީ ގޮތެއްގައި ފެށިފައެއް ނުވެއެވެ.
