ރާއްޖޭގެ އުފެއްދުންތެރިކަން އިތުރުކޮށް ވިޔަފާރި ފުޅާކުރުމުގެ މަގްސަދުގައި ރައީސް ޑރ. މުއިއްޒުގެ ސަރުކާރުން އަންނަ އަހަރު "މޯލްޑިވްސް އެކްސްޕޯ 2025" ބާއްވަން ހަމަޖެހިފައިވާއިރު އެކްސްޕޯ ބާއްވަނީ "ދިވެހިންގެ އުފެއްދުންތެރިކަމުގެ މައުރަޒު"ގެ ނަމުގައި ކަމަށް އިކޮނޮމިކް މިނިސްޓްރީން ބުނެ އެވެ.
އެގޮތުން މައުރަޒު ބާއްވަން ރޭވިފައިވަނީ އަންނަ އަހަރުގެ މެއި މަހުގެ 23 ފެށިގެން 31 ގެ ނިޔަލަށެވެ.
ކުރީގައި ބޭއްވިގެން ދިޔަ މައުރަޒުތަކާ ހިލާފަށް އަންނަ އަހަރުގެ މައުރަޒުގައި ވަރަށް ތަފާތު ކަންތައްތަށް ހިމެނިގެން ދާއިރު 81 ދާއިރާއަށް ވުރެ ގިނަ ދާއިރާއަށް މައުރަޒުގައި ބައިވެރިވެ ވާދަކުރުމުގެ ބައިގައި ހިމެނޭނެކަމަށް މިނިސްޓްރީން ބުނެ އެވެ.
މޯލްޑިވްސް އެކްސްޕޯ 2025 ހުޅުމާލެ ސެންޓްރަލް ޕާކުގައި ބާއްވަން ހަަމޖެހިފައިވާއިރު، ކްރިއޭޓިވް އިކޮނޮމީ ޑިސްޓްރިކްޓް އަކާއި، ޑިޖިޓަލް އިނޮވޭޓިވް ޑިސްޓްރިކްޓްއެއް، އެންޓެޓެއިންމަންޓް ޑިސްޓްރިކްޓް އެއް، އަދި މާކެޓްޕްލޭސް ޑިސްޓރިކްޓްއެއް މައުރަޒުތެރޭ ހިމެނިގެންދާނެކަމަށް އިކޮނޮމިކް މިނިސްޓްރީން ބުންޏެވެ.
ހުޅުމާލެ ސެންޓްރަލް ޕާކްގައި ބާއްވާ މި މައުރަޒު އިންތިޒާމްކޮށް ހިންގުން އިކޮނޮމިކް މިނިސްޓްރީ އާއި އިގުތިސާދީ ތަރައްގީ އާއި ބިޒްނަސް ސެންޓަރ ކޯޕަރޭޝަން (ބީ.ސީ.ސީ) ގުޅިގެން ކުރިއަށް ގެންދެވުމަށް ވަނީ ނިންމަވާފަ އެވެ.
