ނަޝީދު މިހެން ގޮވާލައްވާފައި މިވަނީ ޑޮލަރުގެ ތާށިކަން ބޮޑުވެ ރުފިޔާ ކާޑުން ދެން ޑޮލަރުގެ މުއާމާލާތް ނުކުރެވޭނެކަމަށް ގައުމީ ބޭންކު، ބޭންކް އޮފް މޯލްޑިވްސް އިން ބުނެފައިވަނިކޮށެވެ.
ނަޝީދު އެކްސްގައި ކުރެއްވި ޕޯސްޓެއްގައި ވިދާޅުވީ މި ވަގުތު ހުރިހާ ސިޔާސީ ލީޑަރުންގެ ޒިންމާ ވަރަށް ބޮޑުކަމަށެވެ. އެގޮތުން މާލީ ހާލަތު ރައްޔިތުންނަށް ސާފުކޮށް ކިޔާދިނުމަށްް ނަޝީދު ވަނީ ގޮވާލައްވާފައެވެ.
ގައުމީ ބޭންކުން މިއަދު އާންމުކުރި ބަޔާނެއްގައި ބުނީ ޑެބިޓް ކާޑްތަކުގެ ޕްރައިމަރީ އެކައުންޓަކީ ރުފިޔާ އެކައުންޓެއް ނަމަ ބޭރު ފައިސާގެ މުއާމަލާތްތަކަށް އެއްވެސް އަދަދެއް ނުލިބޭނެ ކަމަށެވެ. އަދި މިއަދުން ފެށިގެން ދޫކުރާ ޑެބިޓް އަދި ކްރެޑިޓް ކާޑުގެ ޕްރައިމަރީ އެކައުންޓަކީ ރުފިޔާ އެކައުންޓެއް ނަމަ ބޭރު ފައިސާގެ މުއާމަލާތްތަކަށް ވެސް އެއްވެސް އަދަދެއް ނުލިބޭނެ ކަމަށް ބުންޏެވެ.
މި ބަދަލާ ގުޅޭ ގޮތުން ބީއެމްއެލްގެ ސީއީއޯ އަދި މެނޭޖިން ޑައިރެކްޓަރު ކާލް ސްޓުމްކަ މިއަހަރުތެރޭ ކަސްޓަމަރުން އަތުން ބޭންކަށް ގަންނަން ލިބުނީ ގާތްގަނޑަކަށް 60 މިލިއަން ޑޮލަރު ކަމަށެވެ. އެހެން ނަމަވެސް ކާޑުތަކުން ކުރެވުނު މުއާމަލާތްތަކުގެ އަދަދު މީގެ ތިން ގުނަ ބޮޑުކަމަށެވެ.
ރާއްޖޭގެ ރިޒާވެ ދަށްވެ އެކަމުގެ ކަންބޮޑުވުންތައްވެސް ރައްޔިތުންގެ ތެރޭގައި ވަނީ އުފެދިފައެވެ. މިދިޔަ ޖުލައި މަސް ނިމުނުއިރު، ބޭނުންކުރެވޭ ރިޒާވްގައި ހުރީ 45 މިލިއަން ޑޮލަރު ކަމަށާއި ނަމަވެސް މިމަހު ދައުލަތުގެ ރިޒާވްގެ ހާލަތު ރަނގަޅުވާނެކަމަށް ލަފާކުރެވޭކަމަށް މޯލްޑިވްސް މަނިޓަރީ އޮތޯރިޓީ، އެމްއެމްއޭއިން ވަނީ ބުނެފައެވެ.
