އިމިގްރޭޝަނުން ބުނީ މި މީހުން ހައްޔަރުކުރީ ގަވާއިދާ ހިލާފަށް އެއްވެސް ސާފުތާހިރުކަމެއް ނެތި، ބިދޭސީން ރާއްޖޭގައި ކުރަމުންދާ ވިޔަފާރިއަކާ ގުޅިގެން ޓާސްކު ފޯސް އަށް ލިބިފައިވާ މަޢުލޫމާތާއި ގުޅިގެން ހިންގި ރެއިޑެއްގައިކަމަށެވެ.
މިދިޔަ ހޮނިހިރު ދުވަހު އިމިގްރޭޝަނުން ހިންގި ރެއިޑްގައި ވަދެފައިވަނީ ހ.ބިއަންކާ އަށެވެ. މި ތަން ބަލާފާސްކޮށް ގަވާއިދާ ހިލާފަށް އުޅެމުންދާ 15 ބިދޭސީއަކު ހައްޔަރުކޮށްފައިވާކަމަށް އިމިގްރޭޝަނުން ބުނެއެވެ. އަދި މިތަނުގައި ކުރަމުން ދިޔަ ވިޔަފާރި ހުއްޓުވަން ނޯޓިސް ދީފައިވާކަމަށްވެސް އެ އިދާރާއިން ބުނެއެވެ.
މި ރެއިޑްގެ ފޮޓޯތައްވެސް އިމިގްރޭޝަނުން ވަނީ އާއްމުކޮށްފައެވެ. އެ ފޮޓޯތަކުން ފެންނަނީ މި މީހުން ކާތަކެތި ހަދާ ވިޔަފާރުކުރަމުން ދިޔައީ ވަރަށް ސާފުތާހިރުކަން ކުޑަތަނެއްގެ ތެރޭގައެވެ. ބެލެވޭ ގޮތުން މީ ބިދޭސީންނަށް ކާތަކެތީގެ ހިދުމަތް ދެމުން އައި ބަޔަކެވެ. މި މީހުން ކައްކަމުން ދިޔަ ތަނާއި އިންވެގެން ފާހާނާއެއް ހުރިއިރު އެތަނުގެ ފޮޓޯވެސް އިމިގްރޭޝަނުން ވަނީ ދައްކާލާފަައެވެ.
ބީދޭސީއަކު މާލޭގައި އުޅޭ ބުޅާތައް ހިފާ އޭގެ މަހުން ކާތަކެތި ހަދާ ވިއްކަމުންދާ ކަމަށް ތުހުމަތުކުރެވޭ މައްސަލައެއް ފެންމަތިވި ހިސާބުން އިމިގްރޭޝަނުން ހިންގާ ރެއިޑްތައް ކުރިޔަށް ގެންދާ ޓާސްކްފޯހުގައި ހެލްތް މިނިސްޓްރީވެސް ވަނީ ހިމަނާފައެވެ. އަދި އޭގެފަހުން ސާފުތާހިރުކަން ކުޑަކޮށް ހުންނަ ކެފޭތައް ބަންދުކުރަންވެސް އެޗްޕީއޭއިން ވަނީ ފަށާފައެވެ.