އިމިގްރޭޝަނުން ބުނީ މި މީހުން ހައްޔަރުކުރީ ރާއްޖޭގައި ފުޅާދާއިރާއެއްގައި ހަށިވިއްކުމުގެ ވިޔަފާރިކުރަމުން ދިޔަ ބިދޭސީންނާއި ގުޅިގެން ފުލުހުންނަށް ލިބުނު މައުލޫމާތަކާއި ގުޅިގެން ހިންގި ރެެއިޑެއްގައިކަމަށެވެ.
މި މަހުގެ 11 ވަނަދުވަހު ހިންގި ރެއިޑްގައި، ހަށިވިއްކުމުގައި އުޅުނު ބިދޭސީން ތިން އަންހެންނަކު އަތުލައިގެންފައިވާކަމަށް އިމިގްރޭޝަނުން ބުނެއެވެ. އަދި މީ މީހުން ލައްވާ މިކަން ކުރުވަމުންދިޔަ އެޖެންޓުގެ ގޮތުގައި ހުރި ފިރިހެން މީހާވެސް ހައްޔަރުކޮށްފައިވާކަމަށް އިމިގްރޭޝަނުން ބުނެއެވެ. އަދި އެމީހަކީވެސް ބިދޭސީއެއްކަމަށްވެސް އެ އިދާރާއިން ބުނެއެވެ.
މި މައްސަލާގައި ހައްޔަރުކުރި އެންމެން ރާއްޖޭ ނާދެވޭގޮތަށް ޑީޕޯޓްކޮށްލާފައިވާކަަމަށް އިމިގްރޭޝަނުން ބުނެއެވެ.
ރާއްޖޭގައި ގަވައިދާ ހިލާފަށް އުޅޭ ބިދޭސީން ހައްޔަރުކުރުމަށް އިމިގްރޭޝަނުން އަންނަނީ ހާއްސަ ރެއިޑްތަކެއް ހިންގަމުންނެވެ. މި ރެއިޑްތަކުގައި ހައްޔަރުކުރި ބިދޭސީންގެ ތެރެއިން މިހާތަނަށް 160 ވުރެ ގިނަ މީހުން ބަންދުގައި ތިބިކަމަށް ދާދީ ފަހުން ހޯމް މިނިސްޓަރު އަލީ އިހްސާން ވަނީ ވިދާޅުވެފައެވެ.
