ޕެންޝަންގެ ގޮތުގައި ލިބޭ 5،000 ރުފިޔާގެ ބަދަލުގައި ބައެއް މީހުންގެ އެކައުންޓަށް މިއަދުވަނީ 15،000 ރުފިޔާ ޖަމާވެފައެވެ. މި ފައިސާ ރިވާސް ކުރުމުގެ މަސައްކަތް ބީއެމްއެލް އަންނަނީ ކުރަމުންނެވެ.
ޕެންޝަން އޮފީހުން ބުނީ ކުރަންޖެހޭ ވަރަށް ވުރެ އިތުރަށް ބައެއް މީހުންގެ އެކައުންޓަށް ޖަމާވީ ބީއެމްއެލްގެ މައްސަލައަކުން ކަމަށެވެ. ޕެންޝަން އޮފީހުގެ އެކައުންޓުން ކެނޑިފައިވަނީ ރަނގަޅު އަދަދުކަމަށް އެ އިދާރާއިން ބުނެއެވެ.
ބީއެމްއެލަށް އޮޅިގެން ޕެންޝަން ފައިސާ އިތުރަށް ބައެއް މީހުންގެ އެކައުންޓަށް ޖަމާވިއިރު މިދިޔަ މަހުވެސް ވަނީ މިކަހަލަ ހާދިސާއެއް ހިނގާފައެވެ. އެ ފަހަރު ލިލީ ބީޗް ރިސޯޓުގެ ބައެއް މުވައްޒަފުންގެ މުސާރަައިގެ ގޮތުގައި 77 ބިލިއަން ޑޮލަރު އެމީހުން އެކައުންޓްތަކަށް ޖަމާވިއެވެ. އެ ފައިސާވެސް ފަހުން ވަނީ އެ އެކައުންޓްތަކުން ރިވާސްކޮށްފައެވެ. އަދި އެކަން ހިނގި ގޮތް ބަލަން މަޖިލީހުގެ ކޮމެޓިން ވަނީ ނިންމާފައެވެ.
