ސިވިލް ކޯޓުގެ އިސްގާޒީގެ މައްސަލަތަކެއް ޖޭއެސްސީއާ އޭސީސީއަށް ހުށަހެޅީ ސިވިލް ކޯޓުގެ މުވައްޒަފުންތަކެއް ކަމަށްވަނީ މައުލޫމާތު ލިބިފަ އެވެ. މައުލޫމާތު ލިބިފައިވާ ގޮތުގައި މިދިޔަ ހަފްތާގައި ހުށަހެޅި މި މައްސަލަތަކަކީ ސިވިލް ކޯޓަށް މުވައްޒަފުން ނެގުމުގައި ވަކި ބަޔަކަށް ފައިދާވާ ގޮތަށް އިސްގާޒީ އަމަލު ކުރައްވަމުން ގެންދަވާ ކަމަށް ތުހުމަތުކުރާ ޝަކުވާއެކެވެ. އެކަމަށް ބާރު ލިބޭ ހެކިތައް ވެސް ޖޭއެސްސީ އަށް ހުށަހަޅާފައިވެ އެވެ.
އެހެންނަމަވެސް މިކަމާ ގުޅޭ ގޮތުން ޖޭއެސްސީން އެއްވެސް އެއްޗެއް ނުބުނެ އެވެ. ޖޭއެސްސީގެ އާންމު އުސޫލު އޮންނަ ގޮތުން ގާޒީއެއްގެ މައްސަލައެއް އެ ކޮމިޝަނަށް ހުށަހެޅި ނަމަވެސް، އެކަން މީޑިއާ އަށް މިހާރު އާންމެއް ނުކުރެ އެވެ.
ސިވިލް ކޯޓުގެ އިސްގާޒީ މަރިޔަމް ވަހީދަކީ، ކުރިން ސުޕްރީމް ކޯޓުންވެސް ފިޔަވަޅު އަޅާފައިވާ ގާޒީއެކެވެ. އެއީ ސުޕްރީމް ކޯޓުން ނިންމާފައިވާ މައްސަލައެއް ސިވިލް ކޯޓްގައި ކުރިއަށް ގެންދަވައި ހުކުމް އިއްވުމާ ގުޅިގެންނެވެ.
އެ މައްސަލައިގައި މަރްޔަމް ވަހީދުގެ ކިބައިން ޝަރީއަތްކުރުމުގެ ހައިސިއްޔަތު ސުޕްރީމް ކޯޓުންވަނީ އޭރު އަތުލާފަ އެވެ. އެއީ ފަނޑިޔާރަކު ކުރި ހުކުމަކާ ގުޅިގެން ސުޕްރީމް ކޯޓުން ފަނޑިޔާރަކާމެދު ފިޔަވަޅު އެޅި ފުރަތަމަ ފަހަރެވެ.
