ޕްރިމިއާ ލީގުގައި ރޭ އޯލްޑްޓްރެފަޑްގައި ޔުނައިޓެޑުގެ މައްޗަށް ލިވަޕޫލުން ކުރި ހޯދީ ތިން ލަނޑު ސުން ލަނޑުންނެވެ. ލިވަޕޫލްގެ ލަނޑުތައް މި މެޗުގައި ޖެހީ މުހައްމަދު ސަލާހް އަދި ލުއިސް ޑިއާޒްއެވެ. ލުއިސް ޑިއާޒް ދެ ލަނޑު ޖެހިއެވެ.
ރޭ ލިވަޕޫލުން ޖެހި ފުރަތަމަ ދެ ލަނޑު ޖެހުމުގައި ޔުނައިޓެޑުގެ ކަސެމީރޯ ވަނީ މިސްޓޭކްތަކެއް ހަދާފަ އެވެ. ފަހުން އޭނާވަނީ ބަދަލުވެސް ކޮށްފައެވެ. މިއީ ލީގުގައި ޔުނައިޓެޑު ވިދިވިދިގެން ބަލިވީ ދެވަނަ މެޗެވެ.
ލިވަޕޫލާއި އެންމެ ފަހުގެ ޗެމްޕިއަން މެންޗެސްޓަ ސިޓީ އަކީ މި ފަަހަރުގެ ލީގުގައި ފުރަތަަމަ ތިން މެޗުން މޮޅުވި ހަމަ އެކަނި ދެ ޓީމެވެ. މީގެ އިތުރުން ލިވަޕޫލަކީ، ފުރަތަމަ ތިން މެޗު ނިމުނުއިރު، ގޯލެއް ނުވަދެ ނިންމާލި ހަމައެކަނި ޓީމެވެ. ލިވަޕޫލްގެ ކޯޗު ސްލޮޓަކީ، ޕްރިމިއާ ލީގުގެ ޓީމަކާ ހަވާލުވެ ފުރަތަމަ ތިން މެޗުން ގޯލެއް ނުވަދެ، 2007 ވަނަ އަހަރު ސްވެން ގޯރަން އެރިކްސަން ކޯޗުކޮށްދިން މެންޗެސްޓާ ސިޓީ އަށް ފަހު މި ރެކޯޑް ހެދި ޓީމެވެ.
