މާލޭގައި މިދިޔަ ބުރާސްފަތި ދުވަހުގެ ރޭ ވަޅިން ބިރު ދައްކައި އަންހެނަކު ރަހީނުކުރި މައްސަލައިގައި ހައްޔަރުކުރި އާދަމް އަތުހަރު ދޫނިދޫ ޖަލު ގޮޅީގައި ދަންޖެހިފައި ހުއްޓާ ފެނިގެން ފަރުވާ ދޭން ފެށީ ރޭގެ ވަގުތެއްގައެވެ. އައީ އައިސީޔޫގައި ވެންޓިލޭޓަރުގައި ފަރުވާދެމުން ދަނިކޮށް އަތްހަރު މަރުވީ މިއަދު 16:08 ހާއިރުކަމަށް ފުލުހުން ބުނެއެވެ.
އަތުހަރުގެ އެއްބަނޑުއެއްބަފާ ބޭބެ މުހައްމަދު ތަސްމީނު ހޮސްޕިޓަލްގައި ހުރެ ނޫސްވެރިންނާއި ވާހަކަ ދައްކަމުން ބުނީ ކޮއްކޮ އަތްހަރުގެ ޕޯސްމޯޓަމް ހަދަން ބޭނުން ނުވާކަމަށާއި ބޭނުންވަނީ ވީ އެންމެ އަވަހަަށް ކޮއްކޮ ވަޅުލާންކަމަށެވެ.
ތަސްނީމު ބުނީ އަހްތަރުގެ ކަރުން ދަންޖެހުމުގެ އެއްވެސް ނިޝާނެއް ފެންނަން ނެތްކަމަށެވެ.
ޖަލުގައި އަތްހަރު ހުރެފައި މަރުވިއިރު ދަންޖެހިފައި ހުރި ފުޓޭޖް ފުލުހުން ދައްކަން ޖެހޭކަމަށް އަހްތަރުގެ ބޭބެ ތަސްމީނު ބުނިއެވެ.
އަތްހަރުގެ މަރު ތަހުގީގުކުރަމުން އަންނަކަމަށް ފުލުހުން ބުނެއެވެ. އަދި އަހްތަރު މަރުވި ސަބަބު ދެނެގަތުމަށް އޮޓަޕްސީ ހެދުމަށް ނިންމާފައިވާކަމަށްވެސް ފުލުހުން ނެރުނު ބަޔާނެއްގައި ވަނީ ބުނެފައެވެ.
އަތްހަރު ދަންޖެހުނު ހާދިސާއާ ގުޅޭ ޓައިމްލައިނެއް ފުލުހުން މިއަދު ވަނީ އާއްމުކޮށްފައެވެ. އެ ޓައިމް ލައިން ދައްކާ ގޮތުން އޭނާ ދަންޖެހިފައި ހުއްޓާ ފެނިގެން ސަލާމަތްކޮށް ހޮސްޕިޓަލަށް ގެންދަން 23 މިނެޓް ވަނީ ހޭދަވެފައެވެ. އަދި ދަންޖެހިފައި ހުއްޓާ ފެނުނީ ގޮޅިގައި ހުރި ކެމެރާއިންކަމަށް ފުލުހުން ވަނީ ބުނެފައެވެ.
