ސައުތު ލީގުގެ ނަމުގައި ރާއްޖޭގެ ދެކުނުގެ އަތޮޅުތަކުގައި ފުޓުބޯޅަ މުބާރާތެއް ބާއްވާނެ ކަމަށް ބުނެ އެފްއޭއެމުން އެސްޓީއޯއާއެކު ސޮއިކުރީ 2022 ވަނަ އަހަރުގެ ނޮވެމްބަރު މަހުއެވެ. އެ އެއްބަސްވުމުގެ އަގަކީ 1.5 މިލިއަން ރުފިޔާއެވެ. މި ފައިސާ އެފްއޭއެމުން ނެގި ނަމަވެސް މުބާރާތެއް ނުބާއްވައެވެ.
މުބާރާތް ނުބާއްވާތީ އެ ފައިސާ ހޯދަން އެފްއޭއެމާ ދެކޮޅަށް އެސްޓީއޯއިން ސިވިލް ކޯޓަށް ހުށަހެޅި މައްސަލައިގެ ހުކުމުގައި އިސްގާޒީ ވިދާޅުވެފައިވަނީ މި މައްސަލައިގެ ލިޔެކިޔުން އެފްއޭއެމްއަށް ހަވާލު ކުރުމަށް މަސައްކަތް ކުރެވުނުނަމަވެސް އެފްއޭއެމްގެ ފަރާތުން ކޯޓަށް ހާޒިރުވެފައި ނުވާ ކަމަށެވެ. އެހެންކަމުން މައްސަލަ ކުރިއަށް ގެންގޮސްފައިވަނީ އެފްއޭއެމްގެ ޣައިރު ހާޒިރުގައި، މައްސަލައަށް އެފްއޭއެމްއިން އިންކާރުކުރާ ކަމުގައި ބަލައިގެންނެވެ.
މި މައްސަލައިގައި ހުށަހަޅާފައިވާ ހެކިތަކަށް ރިއާޔަތްކޮށް، ސިވިލް ކޯޓުން ވަނީ އެސްޓީއޯ އަދި އެފްއޭއެމްގެ ދެމެދުގައި ވެފައިވާ އެއްވަސްވުމަށް އެފްއޭއެމްއިން ހިލާފުވެފައިވާ ކަމަށް ކަނޑައަޅައިފައެވެ. އަދި "އެސްޓީއޯ ސައުތު ލީގު"ގެ ނަމުގައި ފުޓްބޯޅަ މުބާރާތެއް ބޭއްވުމަށް ސްޕޮންސާގެ ގޮތުގައި ދީފައިވާ 1.5 މިލިއަން ރުފިޔާ 2024 ސެޕްޓެމްބަރު 15 ގެ ކުރިން ސިވިލް ކޯޓަށް ދައްކައި ހަލާސް ކުރުމަށް އެފްއޭއެމްގެ މައްޗަށް ހުކުމް ކޮށްފައިވެއެވެ.
މި ނޫންވެސް މި ފަދަ އެތައް މައްސަލައެއްގައި އެފްއޭއެމްގެ މައްޗަށް ފައިސާގެ އެތައް ހުކުމެއް ކޮށްފައި އެބަހުއްޓެވެ. އެފްއޭއެމްގެ ފައިސާއަށް ހިޔާނަތްތެރިވި ކަމަށް ކުރެވޭ ތުހުމަތާ ގުޅިގެން އެފްއޭއެމްގެ ކުރީގެ ރައީސް ބައްސާމް އަދީލް ޖަލީލްގެ މައްޗަށް ކޯޓުގައި ޝަރީއަތްވެސް ކުރެވެމުން އެބަދެއެވެ. އަނެއްކޮޅުން ފީފާއިންވަނީ ބައްސާމް ސަސްޕެންޑްވެސް ކޮށްފައެވެ.
