ސައީދު މިފަދައިން ވިދާޅުވީ ސިންގަލް ވިންޑޯ ޕްލެޓުފޯމު އިފުތިތާހުކުރުމަށް މިއަދު ބޭއްވި ރަސްމިއްޔާތުގަ އެވެ. މިއަދު ޖެން ހޮޓެލް ބޭއްވި ރަސްމިއްޔާތުގައި "ޓްރޭޑިން" ތައާރަފްކޮށްދެއްވީ ނައިބު ރައީސް ހުސެއިން މުހައްމަދު ލަތީފެވެ.
ރަސްމިއްޔާތުގައި މިނިސްޓަރު މުހައްމަދު ސައީދު ވިދާޅުވީ ގޮންޖެހުންތަކާއެކުވެސް ވިޔަފާރިތަކަށް ފަހި މާހައުލެއް ގާއިމްކޮށްދިނުމަށް ސަރުކާރުން ގިނަ މަސައްކަތްތަކެއް ކުރައްވަމުންދާ ކަމަށެވެ.
ސިންގަލް ވިންޑޯއެއް ގާއިމްކުރުމަކީ 2016ވަނަ އަހަރު ފެށި މަސައްކަތެއް ކަމަށާއި މިހާރު އެނިޒާމުގެ ފުރަތަމަ މަރުހަލާގެ ހިދުމަތްތައް އިފްތިތާހުވެގެންދިޔުމަކީ ބޮޑު ކާމިޔާބީއެއް ކަަމަށްވެސް ވިދާޅުވި އެވެ.
އަންނަ އަހަރުގެ ފުރަތަމަ ކުއާޓާގައި ވިޔަފާރި ފަސޭހަކުރުމަށް މުދާ އެތެރެކުރުމުގެ ހުރިހާ އިޖުރާއާތެއް ސިންގަލް ވިންޑޯއަށް ބަދަލުކުރެވުމުން ވިޔަފާރިތަކަށް ވަރަށް ބޮޑު ލުއިތަކެއް ލިބޭނެ ކަމުގައި މިނިސްޓަރު ވިދާޅުވި އެވެ.
އަދި މިހާރު ހިނގަމުންދާ މަސައްކަތް ނިންމައި ފުލް ޕްރޮސެސް ނިމުމުން ޕޯޓުތަކާ ގުޅޭ ގޮތުން އީސް އޮފް ޑުއިން ބިޒްނަސް އިންޑެކްސްއިން ފާހަގަަކުރަމުންއައި ގިނަ މައްސަލަތައް ހައްލުކުރެވިގެންދާނެ ކަމަށެވެ. އަދި މިހާރު ރާއްޖޭގެ ވިޔަފާރީގެ މާހައުލުގެ އޮޑިޓެއް ހަދައިފިނަމަ ކުރިން އިންޑެކްސްގައި ރާއްޖެ އޮތް ހިސާބަށްވުރެ ރަނގަޅު ހިސާބަކަށް ރާއްޖެ ގެންދެވޭނެ ކަމުގައި ސައީދު ވިދާޅުވި އެވެ.
ނެޝަނަލް ސިންގަލް ވިންޑޯ އެކުލަވައިލީ އިކޮނޮމިކް މިނިސްޓްރީގެ ދަށުން ހިންގާ ޓްރޭޑް ނެޓް މޯލްޑިވްސް މެދުވެރިކޮށެގެ. އެކުންފުނީގެ މެނޭޖިން ޑިރެކްޓަރު ސައީދާ އުމަރު ވިދާޅުވީ، ސިންގަލް ވިންޑޯގެ މައިގަނޑު ބޭނުމަކީ ރާއްޖެއަކީ ވިޔަފާރިތަކަށް ފަހި މާހައުލެއްގެ ގޮތުގައި ރާއްޖޭގެ ވިޔަފާރީގެ މާހައުލު ބައްޓަން ކުރުން ކަމަށެވެ.
އޭނާ ވިދާޅުވީ، ވިޔަފާރިތަކަށް ޑިޖިޓަލް ހިދުމަތްތައް ފުޅާ ކުރާ އިރު ޕްރައިވަސީ އެންޑް ޑޭޓާ ޕްރޮޓެކްޝަން ގާނޫނާއި ޑިޖިޓަލް ހިދުމަތްތަކަށް ހާއްސަ ގާނޫނުތައް ހެދުން ވަރަށް މުހިއްމު ކަމަށެވެ.
