މިދިޔަ އޮގަސްޓުމަހު ގާތްގަޑަކަށް 3 ހަފްތާ ވަންދެން މުޅި ރާއްޖެއަށް ވިއްސާރަކުރިއެވެ. އަދި ރާއްޖޭގެ ހުރިހާ ސަރަހައްދަކަށްވެސް ގުގުރުމާއި އެކު ބޯކޮށް ވާރޭވެހި ފެންބޮޑުވެ ގޭގެއަށް ފެން ވަނުމުގެ ހާދިސާތައް ވަނީ ހިނގާފައެވެ.
އެންޑީއެމުން ވަނީ އެ ވިއްސާރާގައި ލިބުނު ގެއްލުންތަކުގެ އެސެސްމަންޓް ހަދާފައެވެ. މި އެސެސްމަންޓް ހަދާފައިވަނީ ވެރިރަށް މާލެއާ އަތޮޅުތަކުގެ ރަށްތައް ވަކިންނެވެ.
އެންޑީއެމުން ބުނީ އަށެއް އޮގަސްޓް އިން ފެށިގެން ރާއްޖެއަށް ކުރަމުން އައި ވިއްސާރާގައި، އޮގަސްޓް މަހުގެ ނިޔަލަށް 10 ރަށެއްގެ 89 ގެއަކަށް ގެއްލުން ލިބިފައިވާކަމަށެވެ. މިގޮތުން އިމާރާތަށާއި ހިފާ ގެންގުޅޭ ތަކެއްޗަށް ލިބުނު ގެއްލުމުގެ އަދަދު 1,084,169 ރުފިޔާއަށް އަރާކަމަށްވެސް އެ އިދާރާއިން ބުނެއެވެ.
އޮގަސްޓްމަހު ކުރި ވިއްސާރާގައި މާލޭގައި ފެންބޮޑުވެފައި
މި ވިއްސާރާގައި މާލޭގައި ފެންބޮޑުވުމުގެ ސަބަބުން އެސެސްމަންޓް ހަދަންޖެހޭކަމަށް ފާހަގަކުރެވުނު 41 ގެއެއްގެ ތެރެއިން 37 ގެއެއްގެ އެސެސްމަންޓް އެންޑީއެމުން ވަނީ ހަދާފައެވެ. ބަކީ ހުރި 4 ގެއިން އެސެސްމަންޓް ހަދަން ބޭނުން ނުވާކަން އެގެތަކުން ބުނިކަމަށް އެ އެންޑީއެމުން ވަނީ ބުނެފައެވެ.
އެންޑީއެމްއޭއިން ބުނީ ވިއްސާރާގައި ފެންބޮޑުވުމުގެ ސަބަބުން މާލޭގައި އިމާރާތަށާއި ހިފާ ގެންގުޅޭ ތަކެއްޗަށް -/819،549ރ ގެ ގެއްލުން ލިބިފައިވާކަމަށެވެ.
