މި މަހު ކުރުމަށް ހަމަޖެހިފައިވާ މި ދަތުރުގައި އެ ކައުންސިލްގައި މަސައްކަތް ކުރާ 35 މުވައްޒަފުންގެ ތެރެއިން 20 މުވައްޒަފުން ބައިވެރިވެއެވެ. މި ދަތުރަށް ކައުންސިލްގެ ބަޖެޓުން 150،000 ވުރެ ގިނަ ރުފިޔާ ހަރަދުވާ މި ދަތުރުގެ ބޭނުމަކީ ތަޖުރިބާ ހޯދުމާއި ޗުއްޓީ ހޭދަކޮށްލުންކަން ވަނީ އެނގިފައެވެ.
ފ. އަތޮޅު ކައުންސިލްގެ އިތުރުުން އެ އަތޮޅު މަގޫދޫ ކައުންސިލްގެ މުވައްޒަފުންތަކެއްވެސް މި މަހު ލަންކާއަށް ދިޔުމަށް ވަނީ ހަމަޖެހިފައެވެ. ތަޖުރިބާ ހޯދުމުގެ ގޮތުން ކުރާ މި ދަތުރަކީ ދުބާއީގެ ކުންފުންޏެއްގެ އެހީގައި ކުރާ ދަތުރެއްކަމަށް އެ ކައުންސިލުން ބުނެއެވެ. އެހެންކަމުން މި ދަތުރަށް ކައުންސިލް ބަޖެޓުން އެއްވެސް ހަރަދެއް ނުދާނެކަމަށް މަގޫދޫ ކައުންސިލުން ވަނީ ބުނެފައެވެ.
އިގްތިސާދު މިހާ ދަތިވެފައިވާ އޮތް ވަގުތެއްގައި ބައެއް އަތޮޅު ކައުންސިލްތަކުން ޗުއްޓީތަކާއި ދިމާކޮށް ތުރުކީއާ ދުބާއީގެ އިތުރުން ބެންކޮކަށް ދަތުރުކުރަމުންދާކަމަށް ވިދަޅުވެ އެކަމުގެ ކަންބޮޑުވުން ރައްޔިތުން މަޖިލީހުގެ ނައިބު ރައީސް އަހްމަދު ނާޒިމް ވަނީ މީގެކުރިން ފާޅުކުރައްވާފައެވެ.
ނާޒިމް ވިދާޅުވީ ލޯކަލް ކައުންސިލްގެ ގާނޫނުގެ ދަށުން ކައުންސިލްތަކަށް ދެވިފައިވާ ބާރުގެ ބޭނުން އެ ކައުންސިލްތަކުން ހިފަނީ އެއްވެސް މާލީ ޒިންމާދާރުކަމެއް ނެތިކަމަށެެވެ. އަދި ކައުންސިލްތަކަށް ބްލޮކް ގްރާންޓްގެ ގޮތުގައި މިއަހަރުވެސް 2.2 ބިލިއަން ރުފިޔާ ސަރުކާރުން ކައުންސިލްތަކަށް ދޭކަން ނާޒިމް ފާހަގަކުރެއްވިއެވެ.
ހަރަދު ކުޑަކުރުމުގެ ސިޔާސަތުގެ ދަށުން ސަރުކާރުން ވަނީ ކައުންސިލްތަކުގައި ތިބޭ ކައުންސިލަރުންގެ އަދަދު މަދުކުރުމުގެ މަސައްކަތް ފަށާފައެވެ.
