ރޮނާލްޑޯގެ ކެރިއަރުގެ 900 ވަނަ ލަނޑަކީ ޔުއެފާ ނޭޝަންސް ލީގުގައި ކްރޮއޭޝިއާ އަތުން ރޭ 2-1 އިން ޕޯޗުގަލް މޮޅުވި މެޗުގައި އެ ޓީމުގެ ކްރިސްޓިއާނޯ ރޮނާލްޑޯ ޖެހި ލަނޑެވެ.
އުމުރުން 39 އަހަރުގެ ރޮނާލްޑޯ އަކީ މި އަދަދަށް ގޯލު ހަމަކުރި ފުރަތަމަ ކުޅުންތެރިޔާ އެވެ. އޭނާއާ އެންމެ ކައިރިން ވާދަކުރާ އާޖެންޓީނާގެ ލިއޮނަލް މެސީ ޖަހާފައިވަނީ 838 ގޯލެވެ.
ރޮނާލްޑޯގެ 900 ގެ ގޯލުގެ ތެރެއިން 131 ގޯލަކީ ގައުމީ ޓީމަށް ކާމިޔާބުކޮށްދީފައިވާ ގޯލުތަކެވެ. ރޮނާލްޑޯ މެޗަށް ފަހު ބުނީ 900 ގޯލު ހަމަކުރެވުމަކީ ފެންނަ ފެނުމަށް އާދައިގެ ކަމެއްހެން ހީވިޔަސް އެ ހިސާބަށް ދިއުމަށް ކޮންމެ ދުވަހަކު ކުރި ބުރަ މަސައްކަތް ކުރި ކަމަށެވެ.
ރޮނާލްޑޯގެ 900 ގޯލަކީ، ސްޕޯޓިން ލިޒްބަން އަށް ޖެހި ފަސް ގޯލާއި، މެންޗެސްޓާ ޔުނައިޓެޑަށް 145 ގޯލާއި ރެއާލް މެޑްރިޑަށް 450 ގޯލާއި ޔުވެންޓަސް އަށް 101 ގޯލާއި އަލް ނަސްރަށް 67 ގޯލުގެ އިތުރުން ޕޯޗުގަލް އަށް 131 ގޯލެވެ.