ބޮޑުތަކުރުފާނު މަގާއި ކޮއިމަލާ ހިނގުން ގުޅޭ ކަންމަތީގައި ކާރަކާއި ސައިކަލެއް ޖެހި އެކްސިޑެންޓްގައި ޒަހަމްވެ ފަރުވާދެމުން ދަނިކޮށް މަރުވި އުމުރުން 21 އަހަރުގެ މުހައްމަދު ލީވާންއެވެ. ލީވާން އަކީ މި އެކްސިޑެންޓްގައި ސައިކަލް ދުއްވަން އިން ޒުވާނާއެވެ.
ލީވާން މަރުވީ އެކްސިޑެންޓަށް ފަހު އައިޖީެއެމް ހޮސްޕިޓަލްގައި ފަރުވާދެމުން ދަނިކޮށެޥެ.
ފުލުހުން ބުނީ މި ހާދިސާގެ ރިޕޯޓް ލިބުނީ ބުދަ ދުވަހުގެރޭ ދަންވަރު 12:53 ހާއިރު ކަމަށެވެ. މި އެކްސިޑެންޓްގެ ފޮޓޯތައް ވަނީ ސޯޝަލް މީޑިއާގައި އާއްމުވެފައެވެ. އެ މަންޒަރުތަކަށް ބަލާއިރި އެކްސިޑެންޓު ހިނގާފައިވަނީ ޓެކްސީ ކޮއިމަލާ ހިނގުމަށް އެޅިވަގުތު ބޮޑުތަކުރުފާނު މަގުން އައި ސައިކަލެއްގައި ޖެހިގެންނެވެ. ސައިކަލްގެ ކުރީކޮޅު އެއްކޮށް ހަލާކުވެފައިވާއިރު ކާރުގެ ދޮރުފަތްވެސް ހުރީ ބަނޑިވެފައެވެ.
މިއީ މިދިޔަ ދެ ދުވަސް ތެރޭ އެކްސިޑެންޓު ވެގެން މަރުވި ދެވަނަ ޒުވާނާއެވެ. މިދިޔަ ހުކުރު ދުވަހު ހެނދުނު ހުޅުމާލޭގައި ސްޕޯޓްސް ކާރަކާއި ސައިކަލެއް ޖެހި ހިންގި އެކްސިޑެންޓްގައި އުމުރުން 23 އަހަރުގެ ޒުވާނެއް ފަރުވާދެމުން ދަނިކޮށް ވަނީ ނިޔާވެފައެވެ.
އަދި އިއްޔެ ހެނދުނު ހުޅުމާލޭގައި ހުޅުމާލޭ ފޭސް ދޭއްގައި ކާރަކާއި ސައިކަލެއް ޖެހި ނުރައްކާތެރި އެކްސިޑެންޓެއް ހިނގާ ޒުވާނަކަށް އަންނަނީ ފަރުވާދެމުންނެވެ. މި ޒުވާނާއަށްވެސް ސީރިއަސް އަނިޔާތަކެއް ލިބިފައިވާކަމަށް ފުލުހުން ވަނީ ބުނެފައެވެ.