ރާއްޖޭގެ ފުޓްބޯޅަ މިހާރު ގޮސްފައި އޮތް މިސްރާބާއި އަދި މިހާރު އޮތް ހާލަތު ވަރަށް ތަފްސީލުކޮށް ހާމަކޮށްދީ "ސީއެންއެމް" އަށް ހާމިދު ލިޔުއްވި ރިޕޯޓެއްގައި ވިދާޅުވީ ދިވެހި ފުޓްބޯޅައިގެ މައި އިދާރާ އެމްއޭއެމް ގައި ކުލަބަކާއި މެދު ފިޔަވަޅެއްވެސް އަޅާނެހާ ސާބިތުކަން ވެސް ނެތިގޮސް މުޅި ފުޓުބޯޅަ ނިޒާމް މިވަގުތު މިއޮތީ ރޫޅިފައިކަމަށާއި، އަދި 8 ކްލަބުން 10 ކްލަބަށް، ޕްރެމިއަ ލީގްގެ ޓީމް އަދަދު އިތުރު ކުރުމަކީ އަސާސީ ގަވާއިދާ ހިލާފަށް ކުރާކަމެއްކަމަށެވެ.
ހާމިދު ވިދާޅުވީ އެފްއޭއެމް ފޭލްވެގެން ފީފާ އިން އުފައްދަން ޖެހުނު ނޯމަލައިޒޭޝަން ކޮމިޓީގެ ވާޖިބަކީ އަސާސީ ގަވާއިދާއެއްގޮތަށް ލީގް ފެށުން ކަމަށާއި މިހާރު ވެސް މިއޮތީ ސީޒަނެއް ގެއްލިފައިކަމަށެވެ. އަދި ލީގް ނުކުޅެ ސީޒަނެއް ގެއްލުމަކީ ކުޅެން ތިބި ކްލަބްތަކަށާއި އަރަމުން އަންނަ ޖީލްތަކަށް އިޔާދަ ނުކުރެވޭނެ ގެއްލުން ވާނެކަމެއްކަމަށް ވެސް ހާމިދު ވިދާޅުވި އެވެ.
އެހެން ކަމުން ނޯމަލައިޒޭޝަން ކޮމިޓީން ލަސްނުކޮށް ލީގް ފަށަން އިއުލާނު ކުރުމަކީ އެންމެ ހެޔޮގޮތްކަމަށް ވާނެ ކަމަށާއި ނޯމަލައިޒޭޝަން ކޮމިޓީގެ ޗެއާގެ ވިސްނުން ހުރީ މިމަގަށް ކަމަށް ވެސް މަސްދަރުތަކުން ބުނާކަމަށް ހާމިދު ވިދަޅުވި އެވެ.
ހާމިދް ވިދާޅުވީ ދިވެހި ޕްރިމިއާ ލީގު ފެށޭނެ ދެ ގޮތެއް އެބައޮތްކަމަށާއި އެއްގޮތަކީ ކުރިއެކޭ އެއްގޮތަށް މާލޭގައި ލީގް ކުޅުންކަމަށެވެ. އަދި ދެ ވަނަ ގޮތަކީ، މުޅި ރާއްޖެއަށް ލީގް ހުޅުވާލުމެވެ.
މާލޭގައި ލީގް ކުޅުމުގެ ތަޖްރިބާއިން މިހާރު ވެސް އެނގެން އޮތް ހަގީގަތަކީ ސަރުކާރުން ފައިސާ ދިނުމުން ވެސް، މާލޭ "އަވަށު" ކްލަބްތަކުގެ މެދުގައި ކުޅޭ ޕްރެމިއަ ލީގް ބަލާނެ މީހަކު ނުވުން ކަމަށާއި މިއީ ދެ ވަނަ ވިސްނުމަކަށް ދާންޖެހޭ ކަމެއްކަމަށް ހާމިދު ވިދަޅުވި އެވެ.
