ފަރުހާދު ރަޝީދު، މި މަގާމަށް އައްޔަނު ކުރައްވާފައި ވަނީ މިއަދު ރައީސް އޮފީހުގައި ބޭއްވި ރަސްމިއްޔާތެއްގައެވެ.
ފަރުހާދު ރަޝީދު 2013 ވަނަ އަހަރުން ފެށިގެން މަސައްކަތް ކުރައްވަމުން ގެންދަވަނީ ސިވިލް ކޯޓުގެ ފަނޑިޔާރެއްގެ ގޮތުގައެވެ. ފަރުހާދު ރަޝީދު ވަނީ މޯލްޑިވްސް ކޮލެޖް އޮފް އިސްލާމިކް ސްޓަޑީޒްއިން ބެޗްލާސް ޑިގްރީ އިން ޝަރީއާ އެންޑް ލޯ ހާސިލްކޮށްފައެވެ.
ދަށުކޯޓުތަކުގެ ފަނޑިޔާރުންގެ ތެރެއިން އެ ކޯޓުތަކުން ޖުޑީޝަލް ސާވިސް ކޮމިޝަން (ޖޭއެސްސީ) އަށް ފަނޑިޔާރަކު ހޮވުމަށް ބޭއްވި އިންތިހާބު ފަރުހާދަ ކާމިޔާބު ކުރެއްވީ، 91 ވޯޓުންނެވެ. ފަރުހާދުއާ އެންމެ ގާތުން ވާދަކުރެއްވި ކްރިމިނަލް ކޯޓުގެ ގާޒީ އިބްރާހީމް އިހްސާނަށް ލިބުނީ 71 ވޯޓެވެ.
މި އިންތިހާބުގައި ޖުމްލަ ފަސް ގާޒީން ވާދަކުރެއްވިއެވެ. އެއީ، ކްރިމިނަލް ކޯޓުގެ ޤާޒީ/ އިބްރާހީމް އިހްސާން، ސިވިލް ކޯޓުގެ ޤާޒީ / އާއިޝަތު އަޒުފާ އަބްދުލްގަފޫރު، ސިވިލް ކޯޓުގެ ޤާޒީ / ފަރުހާދު ރަޝީދު، ފެމިލީ ކޯޓުގެ ޤާޒީ/ އަބްދުﷲ މުހައްމަދު އަދި ސ. ހިތަދޫ މެޖިސްޓްރޭޓް ކޯޓުގެ މެޖިސްޓްރޭޓް / ރަފީއުއްދީން އަހްމަދުއެވެ.
ޖޭއެސްސީގެ މެމްބަރުންގެ ގޮތުގައި މިހާރު ތިއްބެވީ މަޖިލީހުން ކަނޑައެޅި މެމްބަރު، ކޮމިޝަނުގެ ރައީސް ހުސައިން ރިޒާ އާދަމް، ހައިކޯޓް ފަނޑިޔާރު މުހައްމަދު ނިޔާޒް، ރައްޔިތުން މަޖިލީހުގެ ރައީސްގެ ހައިސިއްޔަތު އަބްދުއްރަހީމް އަބްދުﷲ، ސުޕްރީމްކޯޓުގެ ފަނޑިޔާރު ހުސްނުއް ސުއޫދު، ބަންޑާރަ ނައިބު އަހްމަދު އުޝާމް، ސިވިލް ސާވިސް ކޮމިޝަންގެ ރައީސް މުހައްމަދު ނާސިހް، ރައީސްގެ މެމްބަރުގެ ގޮތުގައި މުހައްމަދު ސަމީރު، ގާނޫނީ ވަކީލުންގެ ތެރެއިން އަލީ އަބްދުއްލަތީފް، އާއްމުންގެ ތެރެއިން ޑރ. އާމިނަތު އުއްމުކުލްސޫމްގެ އިތުރުން ދަށުކޯޓްތަކުން އަލީ ޝަރީފްއެވެ.
