"ސީޑް ބައި ބީސީސީ" އަކީ ފްރީލާންސަރުން، ވިޔަފާރިވެރިން، ސްޓާޓްއަޕްތައް އަދި ކުދި ވިޔަފާރިތަކަށް އަމާޒުކޮށްގެން އަގުހެޔޮ އަދި ފްލެކްސިބަލް ވޯކްސްޕޭސް ހައްލުތައް ފޯރުކޮށްދޭ ތަނެކެވެ. މި ފެސިލިޓީގައި ތަފާތު މަސައްކަތްތެރި ސްޓައިލްތަކާއި ޕްރޮފެޝަންތަކަށް އަމާޒުކޮށްގެން ފަރުމާކޮށްފައިވާ ފުރިހަމަ ވަސީލަތްތަކެއް ހުރެއެވެ.
ދިރާގުން މިއަދު ނެރުނު ބަޔާނެއްގައި ބުނީ މި އާ ޕާޓްނަޝިޕްގެ މަގްސަދަކީ ޒަމާނީ ޑިޖިޓަލް ވޯކްސްޕޭސްތަކަށް ބޭނުންވާ ހައިސްޕީޑް ޑިޖިޓަލް ކަނެކްޓިވިޓީ ފޯރުކޮށްދީ، ބީސީސީގެ ހިދުމަތްތަކުން "ސީޑް" އިތުރަށް ފުޅާކުރުމެވެ. އަދި މިއީ އިނޮވޭޝަން، އެންޓްރަޕްރިނިއަރޝިޕް، އަދި ޑިޖިޓަލް އިގުތިސޯދު ކުރިއެރުވުމަށް ދިރާގުން ކުރާ މަސައްކަތް އިތުރަށް ހަރުދަނާކުރުމަށް އެޅޭ މުހިންމު ފިޔަވަޅެއް ކަމަށެވެ.
ދިރާގުގެ މެނޭޖަރު ކޯޕަރޭޓް ސޯޝަލް ރެސްޕޮންސިބިލިޓީ ބިޝާރާ ހަމީދު ވިދާޅުވީ މިއީ ރާއްޖޭގައި ކުދި ވިޔަފާރިތައް ކުރިއަރުވައި، އަމިއްލަ ވިޔަފާރިތައް ކުރާ ފަރާތްތައް ބިނާކުރުމުގެ ގޮތުން އެ ކުންފުނިން ގާއިމުކުރި ޕާޓްނާޝިޕެއް ކަމަށެވެ. އަދި މި ޕާޓްނާޝިޕުގެ ސަބަބުން ރާއްޖޭގެ ބިޒްނަސް އިކޯސިސްޓަމް އިތުރަށް ވަރުގަދަވެ، ފުޅާވެގެން ދާނެ ކަމަށް އުއްމީދުކުރާ ކަމަށް ވިދާޅުވި އެވެ.
"ސީޑް"ގެ ޑިރެކްޓާ ކޮމާޝަލް މުހައްމަދު ޖައުޝަން ވިދާޅުވީ އެ ކުންފުނިން އެސްއެމްއީތައް ކުރިއެރުވުމުގެ މަސައްކަތް ދިރާގު ފަދަ ކުންފުނިތަކުގެ ސަޕޯޓާއި އެކު ކުރިއަށް ގެންދާނެ ކަމަށެވެ. އަދި ދިރާގާ އެކު ކުދި ވިޔަފާރިތަކުން ސީޑްގެ ވޯކް ސްޕޭސްގައި ތިބެގެން، މަސައްކަތް ކުރުން ފަސޭހަވެފައިވާ ކަމަށް ވިދާޅުވި އެވެ.
ދިރާގުން އަންނަނީ ރާއްޖޭގެ ޑިޖިޓަލް ކޮމިއުނިޓީއަށް އެހީތެރިވުމަށް އެކި ގޮތްގޮތަށް މަސައްކަތްތައް ކުރަމުންނެވެ.
