އާސަންދައިން މިހެން ބުނެފައި މިވަނީ ބެންގަލޫރްގެ އެސްޓާ ސީ.އެމް.އައި އިން ފަރުވާ ހޯދަމުން ދިޔަ ބަލިމީހަކަށް ދެމުންދިޔަ އެހީތައް ކަނޑާލާ އެ މީހުން ހާލުގައި ޖައްސާފައިވާކަމަށް އެ އާއިލާގެ މީހަކު ރޭ ސޯޝަލް މީޑިއާގައި އާއްމުކުރި ވާހަކަތަކާއި ގުޅިގެންނެވެ.
އާސަންދައިން މިއަދު ނެރުނު ބަޔާނެއްގައި ބުނީ އުމުރުން 65 އަހަރުގެ އެ މީހާއަކީ އެއާ އެމްބިއުލާންސެއް މެދުވެރިކޮށް ޒަކާތު ފަންޑުން ހަރަދުކޮށްގެން ސައުދީ އަރަބިއްޔާގެ ޖިއްދާއިން އިންޑިއާއަށް ގެންދިޔަ މީހެއް ކަމަށެވެ. އަދި ޒަކާތު ފަނޑުން ފދިން އެހީއާއި ދައުކަތުން ދިން އެހީއާއި އެކު 1.5 މިލިއަން ރުފިޔާ އެމީހާއަށް ހަމަޖައްސާދީފައިވާކަމަށް އާސަންދައިން ނެރުނު ބަޔާނުގައިވެއެވެ.
މިމީހާއަށް ފަރުވާ ދެމުންދަނީ ހައިޕޮކްސިކް އިސްކެމިކް އެންސެޕަލޯޕެތީއަށްކަމަށާއި އެމީހާއަށް ބޭނުންވާ ފަރުވާއަށް އެޑްމިޓް ކުރުމަށް އެސްޓާ ސީ.އެމް.އައި އިން އާސަންދަށް ރިކުއެސްޓް ފޮނުވީ މާޗު 14، ގައިކަމަށްވެސް އާސަންދައިން ބުނެއެވެ. އަދި އޮގަސްޓް 18 އާއި ހަމައަށް ހޮސްޕިޓަަލުން ފޮނުވި ހުރިހާ ލިޔުމަކަށް އެޕްރޫވް ދީފައިވާކަމަށްވެސް އާސަންދައިން ބުނެއެވެ.
ގާތްގަނޑަކަށް ފަސް މަސް ދުވަހުގެ މުއްދަތަށްފަހު، ބަލި މީހާގެ ހާލަތަށް ބަދަލެއް އައިސްފައި ނުވާތީ، އިތުރު ސަޕޯޓިވް ކެއާ ރާއްޖޭގައި ކުރިއަށް ގެންދިޔުމަށް ވެންޓިލޭޓަރު ސަޕޯޓާއެކު ބަލި މީހާ އަނބުރާ ގެނައުމަށް އޯގަސްޓް 14، ގައި އާއިލާއާ ވާހަކަ ދެކެވިފައިވާ ކަމަށް އާސަންދައިން ބުނެއެވެ.
އޮގަސްޓްމަހުގެ 18 ވަނަދުވަހާއި ހަމައަށް މި މީހާގެ ބޭސްފަރުވާއަށްް ހިނގާފައިވާ ހަރަދުތަކުގެ ފައިނަލް ބިލް ލިބިފައިވާއިރު އެ ބިލްތަކުގެ ޖުމްލަ އަދަދު 89،339.91 ޑޮލަރު އަރާފައިވާކަމަށް އާސަންދައިން ބުނެއެވެ. އަދި އާސަންދަ ސްކީމުން ކަވަރު ނުކުރާ ޗާޖުތައް އުނިކުރުމަށްފަހު ބާކީ އޮތް 85،989.15 ޑޮލަރު އާސައިންދައިން ހަމަޖައްސާދިނުމަށް އެޕްރޫވް ދީފައިވާކަމަށްވެސް އެ އިދާރާއިން ނެރުނު ނޫސް ބަޔާނުގައިވެއެވެ.
