ދިވެހި ސަރުކާރާއި ޗައިނާގެ މަރުކަޒީ ބޭންކް، ޗައިނާގެ ޕީޕަލްސް ބޭންކް (ޕީބީއޯސީ) އާ ދެމެދު، ކަރަންޓް އެކައުންޓް މުއާމަލާތްތައް ދެ ގައުމުގެ ފައިސާއިން ހިންގުމަށް މަގުފަހިކޮށްދިނުމަށް ފަހުމުނާމާ (އެމްއޯޔޫ) އެއްގައި ވަނީ ސޮއިކޮށްފަ އެވެ.
މި އެއްބަސްވުމާއި ގުޅިގެން މިނިސްޓަރު ފައިސަލް ފޭސްބުކް ގައި ކުރެއްވި ޕޯސްޓެއްގައި ވިދާޅުވީ، ރާއްޖެއާއި ޗައިނާއާއި ދެގައުމުގެ އަމިއްލަ ފައިސާ ބޭނުންކުރަން ވެވުނު އެއްބަސްވުމުގެ ސަބަބުން ފަތުރުވެރިކަމަށް ބޮޑު ކުރިއެރުމެއް ލިބޭނޭކަމަށާއި ލޯކަލް ކަރަންސީ ސެޓްލްމަންޓް ފްރޭމްވޯކް އެއްބަސްވުމަކީ ޗައިނާއާ އެކު އިގްތިސާދީ ގުޅުން ބަދަހިކުރުމަށް ރައީސް، ޑރ. މުހައްމަދު މުއިއްޒު ގެންގުޅޭ ސިޔާސަތަށް ލިބުނު ވަރަށް ބޮޑު ކުރިއެރުމެއް ކަމަށެވެ.
މިކަމުގެ ސަބަބުން ރާއްޖެ އަންނަ ޗައިނާގެ ފަތުރުވެރިންނަށް ފައިސާ ދެއްކުމުގައި ލުއިފަސޭހަތަކެއް ލިބި، ފަތުރުވެރިން އައުން އިތުރުވާނެ ކަމަށް މިނިސްޓަރ ވިދާޅުވި އެވެ.
އަދި ފަތުރުވެރިކަމުގެ ސިނާއަތާއި، ޗައިނާގެ ވިޔަފާރިތަކަށް ވެސް މިކަމުގެ ފައިދާ ކުރާނެ ކަމަށް ވެސް މިނިސްޓަރ ވިދާޅުވި އެވެ.
އެންމެ ފަހުގެ ތަފާސްހިސާބުތައް ދައްކާ ގޮތުން، ޗައިނާ އާއި ރާއްޖެއާ ދެމެދު އަހަރަކު ގާތްގަނޑަކަށް 700 މިލިއަން އެމެރިކާ ޑޮލަރުގެ ވިޔަފާރީގެ މުއާމަލާތް ކުރެ އެވެ. މިވަގުތު، ޗައިނާއަކީ ރާއްޖެ އަށް އެންމެ ގިނަ ޓޫރިސްޓުން އަންނަ ގައުމެވެ.
މިދިޔަ ހަފުތާގެ ނިޔަލަށް ޗައިނާ އިން މި އަހަރު ރާއްޖެ އަށް އައި ޓޫރިސްޓުންގެ އަދަދު ވަނީ 200،000 ހުރަސްކޮށްފަ އެވެ.
