މިނިސްޓްރީގެ ތަފާސްހިސާބުތަކުން ދައްކާގޮތުގައި މިހާތަނަށް ރާއްޖެއަށް ޒިޔާރަތްކުރި ފަތުރުވެރިންގެ އަދަދު 1.4 މިލިއަނަށްވުރެ ވަނީ އިތުރުވެފައެވެ. މިއީ މިދިޔަ އަހަރުގެ މި މުއްދަތާ އަޅާބަލާއިރު 10 އިންސައްތައިގެ އިތުރުވުމެކެވެ.
މިހާރު ދުވާލަކު އެވްރެޖްކޮށް 5,000 ފަތުރުވެރިން ރާއްޖެއަށް ޒިޔާރަތްކުރާކަމަށް ތަފާސްހިސާބުތަކުން ދައްކައެވެ. މި ރޭޓުން ގޮސްފިނަމަ މި އަހަރުގެ ޑިސެމްބަރު މަހުގެ މެދުތެރޭގައި ދެ މިލިއަނަވަނަ ފަތުރުވެރިޔާ ރާއްޖެއަށް ޒިޔާރަތްކުރާނެކަމަށް ލަފާކުރެވެއެވެ.
ޔޫރަޕުގެ ބައެއް ގައުމުތަކުން އަންނަ ފަތުރުވެރިންގެ އަދަދު އިތުރުވަމުންދާކަމަށް ފާހަގަކުރެވެއެވެ. އެގޮތުން ރަޝިއާގެ އިތުރުން އިނގިރޭސިވިލާތާއި އިޓަލީން އަންނަ ފަތުރުވެރިންގެ އަދަދު އިތުރުވެފައިވެއެވެ.
ފަތުރުވެރިން ރާއްޖޭގައި ހޭދަކުރާ މުއްދަތު އިތުރުވުމާއެކު ޓޫރިޒަމުން ލިބޭ އާމްދަނީވެސް އިތުރުވެފައިވެއެވެ. ޖުލައި މަހު ޓޫރިޒަމުން 274 މިލިއަން ޑޮލަރަށްވުރެ ގިނަ އާމްދަނީ ލިބިފައިވާކަމަށް ސަރުކާރުގެ ތަފާސްހިސާބުތަކުން ދައްކައެވެ.
