އިމިގްރޭޝަނުން ބުނީ މި ޕްލެޓްފޯމް މެދުވެރިކޮށް ހުށަހެޅޭ މައްސަލަތަކުގެ ތެރެއިން ގިނަ މައްސަލަތަކަކީ ގާވާއިދާ ހިލާފަށް ރާއްޖޭގައި އުޅޭ ބިދޭސީންނާ ގުޅޭ މައްސަލަތައް ކަމަށެވެ. އަދި މިހާތަނަށް ހުށަހެޅިފައިވާ މައްސަލަތަކުގެ ތެރެއިން 490 އަށްވުރެ ގިނަ މައްސަލަ މިވަގުތު ބަލަމުންދާ ކަމަށާއި، 100 އަށްވުރެ ގިނަ މައްސަލަ ވެރިފައި ކުރަމުންދާ ކަމަށް އިމިގްރޭޝަނުން ހާމަކުރިއެވެ.
މި ނިޒާމުގެ ދަށުން ހުށަހެޅޭ މައްސަލަތަކާ ގުޅިގެން އިމިގްރޭޝަނުން ވަނީ 260 އަށްވުރެ ގިނަ ތަނެއް ރެއިޑްކޮށްފައެވެ. އަދި މިހާތަނަށް 3500 އަށްވުރެ ގިނަ ބިދޭސީން ރާއްޖެއިން ފޮނުވާލާފައިވާ ކަމަށް އިމިގްރޭޝަނުން ބުންޏެވެ.
އިމިގްރޭޝަން ވޮޗް މެދުވެރިކޮށް މައްސަލަ ހުށަހަޅާ ފަރާތްތަކުގެ މަޢުލޫމާތު ސިއްރުކުރެވޭނެ ކަމަށާއި، 24 ގަޑިއިރު މައްސަލަ ހުށަހެޅޭނެ ކަމަށްވެސް އިމިގްރޭޝަނުން ފާހަގަކުރިއެވެ. ސަރުކާރުގެ އަމާޒަކީ ރާއްޖޭގައި ތިބި ހުރިހާ ބިދޭސީންގެ މަޢުލޫމާތު އެއް ޑޭޓާބޭސްއަކަށް ގެނެސް، ބިދޭސީންގެ މައްސަލަތަކަށް 3 އަހަރުގެ ތެރޭގައި ޙައްލެއް ހޯދުން ކަމަށް އިމިގްރޭޝަނުން ބުންޏެވެ.
