ހެންވޭރުގައި ބިދޭސީން ހިންގާ ގާމަގުގެ ކެފޭގައި ހިނގި އަލިފާނުގެ ހާދިސާއާ ގުޅިގެން 57 މީހަކު މަގުމަތިވިކަމަށް އެންޑީއެމްއޭއިން ވަނީ ބުނެފައެވެ. އޭގެތެރޭގައި ހިމެނެނީ 37 ދިވެހިންނާއި 20 ބިދޭސީންކަމަށްވެސް އެ އިދާރާއިން ވަނީ ބުނެފައެވެ.
ހާލުގައި ޖެހުނު މީހުންގެ ތެރެއިން 10 މީހަކު އަދިވެސް ތިބީ ވަގުތީ ހިޔާތަކުގައެވެ. މީ މީހުންނަކީ 4 އާއިލާއަކަށް ނިސްބަތްވާ މީހުންކަމަަށް އެންޑީއެމްއޭއިން ބުނެއެވެ. މި ހާދިސާގައި ހާލުގައި ޖެހުނު ބިދޭސިންނަށްވެސް އެންޑީއެމްއޭއިން އަންނަނީ ވަގުތީ ބޯހިޔާވަހިކަން ފޯރުކޮށްދެމުންނެވެ. އެންޑީއެމްއޭއިން ބުނީ ވަގުތީ ހިޔާގައި ތިބި ބިދޭސީން އެމީހުންގެ ސްޕޮންސަރުންނާއި ހަވާލުކުރުމުގެ މަސައްކަތް ކުރިޔަށްދާކަމަށެވެ.
އަލިފާނުގެ ހާދިސާ ހިނގި އިމާރާތުގެ ތިންވަނަ ބައިގައި 50 ވުރެ ގިނަ ބިދޭސީން ދިރިއުޅެއެވެ. މި ތަން ހަދާފައި ހުރީ ޑެކް އަޅައިގެން ތިން ބުރިއަށެވެ. ވަށައިގެން ޖަހާފައި ހުރީ ޓިނެވެ. މި އިމާރާތުގެ އެންމެ ތިރީގައި ހުންނަނީ ބީދޭސީނަށް ކާންދޭ ކެފޭއެކެވެ. އެތަނުގެ ބަދިގެ ހުންނަނީ ދެވަނަ ބުރީގައެވެ. އަލިފާން ފުރަތަމަ ހިފީ އެތަނުގައެވެ.
އަލިފާނުގެ ހާދިސާގައި މި އިމާރާތްވަނީ ބޭނުންނުކުރެވޭ ވަރަށް އަނދާފައެވެ. އެހެންކަމުން ސިޓީތަކާއި ބެހޭ މިނިސްޓްރީން ވަނީ އެތަން ތަޅާލާފައެވެ.
