ޑިއެގޯ ގާސިއާ އިން ރާއްޖޭގެ މައި އެއާޕޯޓް ވެލާނާ އިންޓަނޭޝަނަލް އެއާޕޯޓަށް މި ދަތުރުކުރީ ރާއްޖޭގެ ފުރަތަމަ ލަގްޒަރީ އެއާލައިން "ބިއޯންޑު"ގެ ބޯޓެއްގަ އެވެ.
ވެލާނާ އިންޓަނޭޝަނަލް އެއާޕޯޓުގެ އެރައިވަލްސް މައުލޫމާތުގައިވާ ގޮތުން ބިއޯންޑުގެ "B4 3101" ފްލައިޓު ޑިއޭގޯ ގާސިއާއިން ފުރައިގެން އައިސް ރާއްޖެ ޖައްސާފައިވަނީ މިރޭ އިރާކޮޅު 19:14 ގަ އެވެ.
ބިއޯންޑް އެއާލައިނަކީ އެންމެ މަތީ ފަންތީގެ ދަތުރުތަކަށް ހާއްސަ، ދުނިޔޭގެ ފުރަތަމަ ލަގްޒަރީ އެއާލައިނެވެ. ބިއޯންޑް އެއާލައިނަކީ ރާއްޖޭގެ މަޝްހޫރު ވިޔަފާރި ކުންފުނި ސިމްޑީ ކުންފުންޏާއި، އަދި އެ ކުންފުންޏާ އެކު މަސައްކަތްކުރަމުންދާ ޔޫއޭއީގެ އަރަބެސްކް ގުޅިގެން އުފައްދާފައިވާ އެއާލައިނެކެވެ. އަރަބެސްކް ކުންފުންޏަކީ، އޭވިއޭޝަން ދާއިރާގެ ގިނަ ތަޖުރިބާތަކެއް ހުރި އިންވެސްޓުމެންޓް ކުންފުންޏެކެވެ.
އެމެރިކާގެ އަސްކަރީ މަރުކަޒަކުން ރާއްޖެއަށް މިރޭ ކުރި ދަތުރަކީ ކޮން ސަބަބަކާ ހުރެ ކޮން ބަޔަކު ގޮވައިގެން ކުރި ދަތުރެއްކަން ސާފެއްނުވެ އެވެ. ބިއޯންޑުން އާންމުކޮށް ދަތުރުކުރަނީ ލަގްޒަރީ ޓޫރިޒަމް މާކެޓަށް ޓާގެޓުކޮށްގެނެވެ.
ނަމަވެސް، "ބިއޯންޑް" އިން މީގެ ކުރިން ވެސް އެކި ބޭނުންތަކަށް ފްލައިޓްތައް ޗާޓަރަށް ދޫކޮށްފައިވެ އެވެ. ސީރިއާގައި ތިބި ދިވެހިން ގެނައުމަށް ދިވެހި ސަރުކާރުން މީގެ ކުރިން ވެސް އެ އެއާލައިންގެ ފްލައިޓެއް ޗާޓަރު ކޮށްފައިވެ އެވެ.
އިންޑިއާ ކަނޑުގައި ރާއްޖޭގެ ދެކުނުން 500 ކިލޯ މީޓަރު ދުރުގައި އޮންނަ ޗާގޯސް އައިލެންޑްސްގައި ހިމެނޭ 60 ރަށުގެ ތެރެއިން އެއް ރަށް ކަމުގައިވާ ޑިއޭގޯ ގާސިއާ އެމެރިކާ އާއި އިނގިރޭސި ސިފައިން ވެސް އަސްކަރީ ބޭނުމަށް ބޭނުން ކުރެ އެވެ. އެއީ އީކުއޭޓަރުގެ ދެކުނުގައި އޮންނަ އަސްކަރީ މަރުކަޒެކެވެ.
މިފަހުން ނިއުކްލިއާ ބެލިސްޓިކް މިސައިލް ފޮނުވުމުގެ ގާބިލުކަން ލިބިފައިވާ އެމެރިކާގެ ކަނޑުގެ އަސްކަރިއްޔާގެ ސަބްމެރިންއެއް ފުރަތަމަ ފަހަރަށް، ރާއްޖެއާ ކައިރީގައި އޮންނަ ޑިއޭގޯ ގާސިއާގައި ބަނދަރުވެސް ކުރި އެވެ.
މޮރިޝަސް އިން ދެކޭ ގޮތުގައި ޗާގޯސްގެ ރަށްތަކަކީ އެ ގައުމުގެ ބައެކެވެ. އެގޮތަށް ކަނޑައަޅަން އދ.ގެ އާއްމު މަޖިލީހުން 2019 ވަނަ އަަހަރު ވަނީ ފާސްވެސްކޮށްފަ އެވެ. ނަމަވެސް ރާއްޖެ އާއި ޗާގޯސްއާ ދެމެދު ފުށުއަރާ ކަނޑުގެ ސަރަހައްދުގެ އިން ވަކިކުރުމުގެ މައްސަލައިގައި ބައިނަލްއަގުވާމީ ކަނޑުގެ ގާނޫނާ ބެހޭ ޓްރައިބިއުނަލުން ނިންމާފައިވާ ނިންމުމާ ގުޅިގެން، ދެކުނުގެ އިގްތިސާދީ ސަރަހައްދުން ގެއްލުނު ކަމަށް ބުނާ ބައި ހޯދުމަށް މި ސަރުކާރުން ރިޔާސީ ވައުދެކެވެ.
