މިއަދު ރައީސް އޮފީހުގައި ބޭއްވި ނޫސްވެރިންގެ ބައްދަލުވުމުގައި މައުލޫމާތު ދެއްވަމުން މިނިސްޓަރު ޝަހީމް ވިދާޅުވީ މިއަހަރުގެ މިހާތަނަށް ފަގީރުންގެ 3184 ފަގީރުން ދަފްތަރުގައި ރަޖިސްޓާ ކުރެވިފައިވާކަމަށެވެ.
އެގޮތުން ދަފްތަރު އަލުން މުރާޖާ ކުރުމަށް ފަހުގައި ބޮލަކަށް 4000 ރުފިޔާ އަދަދަކުން މިއަހަރު ޒަކާތް ބަހާ ނިންމާފައިވާކަން ފާހަގަކޮށް ޝަހީމް ވިދާޅުވީ ގާތްގަނޑަކަށް 12 މިިލިއަން، 7 ލައްކަ ރުފިޔާ ފަގީރުނަށް ބެހިފައިވާކަމަށެވެ. އަދި އެއީ އެހެން އަހަރުތަކާ ބަލާއިރުގައި ރެކޯޑު އަދަދެއް ކަމަށް ޝަހީމް ވިދާޅުވި އެވެ.
މިއަހަރުގެ މިހާތަނަށް އާއިރުގައި 76 މިލއަން ރުފިޔާ ޒަކާތު ފަންޑަށް ލިބިފައިވާ ކަމަށާއި 76 މިލިއަން ރުފިޔާއަކީ އެހެން އަހަރުތަކާ ބަލާއިރުގައި ގާތްގަޑަކަށް 10 ޕަސްންޓް ނުވަތަ 11 ޕަސްންޓްގެ ކުރިއެރުމެއް ކަމަށް ޝަހީމް ފާހަގަކުރެއްވި އެވެ.
ރާއްޖެއިން ފަގީރުކަން ނައްތައިލާ ޒަކާތާ ބެހޭ ކަންކަން ވިހާ ވެސް ހަރުދަނާކޮށް ހިންގުމަށް، ދިވެހި ރާއްޖޭގެ ޒަކާތު ހައުސްގެ ނަމުގައި ވަކި އިދާރާއެއް ސަރުކާރުން އުފެއްދީ މިއަހަރު ޖެނުއަރީ މަހުގެ 2 ވަނަދުވަހު އެވެ. މި އިދާރާގެ ބޭނުމަކީ ރާއްޖޭގައި ޒަކާތުގެ އިލްމު ފެތުރުމާއި، ޒަކާތް ނެރުމާއި ޒަކާތާ ގުޅޭ ގޮތުންހޭލުންތެރިކުރުމުގެ މަސައްކަތް ކުރުމެވެ.
މީގެ އިތުރުން ޒަކާތު ފަންޑަށް ލިބޭ ފައިސާ އިންވެސްޓްކޮށް، އިތުރުކުރުމާއި އެ ފަންޑަށް ލިބޭ ފައިސާއިން ބޭނުންތެރި މުހިންމު މަޝްރޫއުތައް ހިންގުމަކީވެސް މި އިދާރާގެ ޒިންމާތަކުގައި ހިމެނޭކަމަކެވެ.
