މި މައްސަލާގައި ހައްޔަރުކޮށްފައިވަނީ މެލޭޝިޔާގެ ދެ ރައްޔިތެކެވެ. ފުލުހުން ބުނީ މި ދެމީހުންނަކީ ދުނިޔޭގެ އެކި ގައުމުތަކަށް ޑުރަގު ގެންގޮސްދިނުމުގައި އިސްކޮށް އުޅޭ ދެމީހުންކަމަށާއި އެމީހުން ރާއްޖެއަށް އެތަކެތި ގެނައީ ރާއްޖެ މަގުން އިނގިރޭސިވިލާތަށް ގެންދިޔުމަށްކަމަށެވެ.
ފުލުހުން ބުނީ ރާއްޖެއަށް ޑްރަގު އެތެރެކުރީ އެން ޖީ ތަމް ލިޕް ނަމަކަށް ކިޔާ 44 އަހަރުގެ މެލޭޝިޔާ މީހެއްކަމަށެވެ. އަދި އެމީހާ އެތެރެކުރި ޑުރަގާއި ހަވާލުވާން އައީވެސް ކޯ ޚުއާން ބޫން ކިޔާ އުމުރުން 41 އަހަރުގެ މެލޭ ރައްޔިތެއްކަމަށެވެ.
ޑްރަގާއި ހަވާލުވާން އައި މީހާ ރާއްޖެ އެތެރެވެފައިވަނީ އޭގެ ދެ ދުވަސްކުރިން ކަމަށާއި މި ދެ މީހުން ރާއްޖޭގައި މަޑުކުރަން ރިޒަވޭޝަން ހައްދާފައި ވަނީ އެއް ހޮޓަލެއްގައިކަމަށްވެސް ފުލުހުން ބުނެއެވެ.
މި ދެމީހުން ރާއްޖެއަށް މަސްތުވާތަކެތި އެތެރެކުރީ އެތަކެތި އިނގިރޭސިވިލާތައް ގެންދިޔުމަށް ޕެކިން ބަދަލުކުރުމަށްކަމަށް ފުލުހުން ބުނެއެވެ. އަދި މީ ވަރަށް ގިނަ މީހުން ވަޓްސް އަޕުން ވާހަކަދައްކައިގެން އޮޕަރޭޓް ކުރާ ނެޓްވޯކެއްކަމަށްވެސް ފުލުހުން ބުނެއެވެ. އެހެންކަމުން މި މައްސަލަ ތަހުގީގުކުރަމުން އަންނަނީ އެހެން ގައުމަތަކާއި ވާހަކަ ދައްކާ އިންޓަޕޯލާއިވެސް ގުޅިގެންކަންވެސް ފުލުހުން ފާހަގަކުރިއެވެ.
