ނޯމަލައިޒޭޝަން ކޮމިޓީން ފުރަތަމަ ފަހަރަށް ނޫސްވެރިންނާ ބައްދަލުކޮށް މިއަދުވަނީ އެ ކޮމިޓީ ހަވާލިވިއިރު، އެފްއޭއެމް އޮތް ހާލަތު ކިޔައިދެއްވައިފިއެވެ. ޒުހޫރު ވިދާޅުވީ އެފްއޭއެމްގެ ގެ ހުރިހާ ކަމެއްހެން އޮތީ ފެއިލްވެފައި ކަމަށާއި ގާތްގަނޑަކަށް އެފްއޭއެމް ނެތި ގޮސްފައިވާ ކަމަށެވެ. ޒުހޫރު ވިދާޅުވީ، އެފްއޭއެމްގެ ހާލަތު އޮތީ ގިނަ އަހަރުތަކެއްގެ ތެރެއިން ގޯސްވަމުން އައި "އެފްއޭއެމް ނެތިދާނެ" ހާލަތުގައި ކަމަށެވެ. އެހެންކަމުން، މި ވަގުތު ނޯމަލައިޒިން ކޮމިޓީން ހަވާލުވެ ތިބީ، އެ ފަރާތްތަކުގެ ހަޔާތުގައި ވެސް، އެންމެ "ޗެލެންޖިން" މަސައްކަތުގައި ކަމަށް ޒުހޫރު ވިދާޅުވި އެވެ.
ޒުހޫރު ވިދާޅުވީ އެންމެ ބޮޑު މަގުސަދަކީ ފީފާ އިން ހަވާލުކޮށްފައިވާ ޒިންމާ، އެއް އަހަރު ދުވަސް ތެރޭ އެފްއޭއެމް ނޯމަލައިޒް ކުރުމުގެ ކަންކަން ހަމަޖެހިގެންދާ އުސޫލެއްގެ ތެރެއިން ނިންމާލުން ކަމަށެވެ. އަދި އެންމެ ބޮޑަށް މަސައްކަތް ކުރާނީ ވީހާވެސް އަވަހަށް، ކަނޑައަޅާފައިވާ މުއްދަތުގެ ވެސް ކުރިން ހުރިހާ ކަމެއް ނިންމާލައި، އެފްއޭއެމް އަލުން ހިނގައިގަންނާނެ ހަމަ މަގަކަށް އެޅުވުމަށް ކަމަށް ކޮމިޓީގެ މެމްބަރުން ވަނީ ބުނެފަ އެވެ.
މިދިޔަ މަހު، 19 ވަނަ ދުވަހު، ފީފާ އިން އެފްއޭއެމް ނޯމަލައިޒިން ކޮމިޓީ ފައިނަލް ކުރިއިރު، ޗެއާމަނަކަށް ހަމަޖެއްސީ، ކުރީގެ ސްޕޯޓްސް މިނިސްޓަރުކަން ކުރެއްވި، ޒުހޫރު އެވެ. ނޯމަލައިޒިން ކޮމިޓީގައި ދެން ހިމެނޭ މެމްބަރުންނަކީ، ފަރީހާ ޝަރީފް، އަހުމަދު މުއިއްޒު، އިސްމާއިލް ސިމަން އަދި އަހްމަދު އަލީ އެވެ.
