ހއ. އުލިގަމުގައި މިރޭ ބޭއްވި ރަސްމިއްޔާތެއްގައި މި ގޭޓް އިފްތިތާހުކޮށް ދެއްވީ ދައުލަތަށް ގިނަ ދުވަސްތަކެއް ވަންދެން ހިދުމަތް ކުރެއްވި ޖަސްޓިސް ރިޓަޔާޑް އިދުރީސް އާދަމެވެ.
ރާއްޖޭގައި ފުރަތަމަ ފަހަރަށް ބައިނަލްއަގުވާމީ ބަންކަރިން ހިދުމަތް މާދަމާ ފަށަން ތައްޔާރުވެފައިވާ އިރު، މި ހިދުމަތް ފެށުމަށް ސަރުކާރުގެ ކަމާބެހޭ އިދާރާތަކާއެކު ގުޅިގެން ކުރަންޖެހޭ އެންމެހާ މަސައްކަތްތައް ވަނީ ނިންމައިފަ އެވެ.
އެ ރަސްމިއްޔާތުގައި އެސްޓީއޯގެ ސީއީއޯ އަހުމަދު ޝިމާދު ވިދާޅުވީ، ބަންކަރިން ހިދުމަތާއި އުތުރު ގޭޓްވޭގައި ދޭ އިތުރު ހިދުމަތްތަކާ އެކު ރާއްޖޭގެ އުތުރުގެ ސަރަހައްދު ބޮޑު މާކެޓް ޕްލޭސް އަކަށް ބަދަލުވެގެންދާނެ ކަމަށެވެ.
ޝިމާދު ވިދާޅުވީ، އުތުރުގެ ސަރަހައްދަކީ ހުޅަނގު އިރުންނާއި އިރު ހުޅަނގުން 200 އަށް ވުރެ ގިނަ ބޯޓުތައް ދަތުރު ކުރާ ސަރަހައްދެއް ކަމަށެވެ. އެހެންވެ، އަލަށް ފަށާ ބަންކަރިން ހިދުމަތާ އެކު އެ ސްޓްރެޓެޖިކް ލޮކޭޝަންގެ ބޭނުން ކުރެވޭނެ ކަމަށެވެ.
މާދަމާ ފަށާ އެ ހިދުމަތާއެކު ފުރަތަމަ ފަށާނީ އި ފްލޯޓިން ބަންކަރިންގެ ހިދުމަތެވެ.
އެމްޕީއެލްގެ ސީއީއޯ މުހައްމަދު ވަޖީހު އިބްރާހިމް ވިދާޅުވީ، މިރޭ ހުޅުވުނު އޮފީސް މެދުވެރިކޮށް، 14 ހިދުމަތެއް ފޯރުކޮށްދެވޭނެ ކަމަށެވެ. އޭނާ ވިދާޅުވީ، އެ ކުންފުނީގެ މުވައްޒަފުންގެ ކިބައިގައި އެ ހިދުމަތްތައް ދިނުމުގެ ގާބިލްކަން ހުރި ކަމަށާއި އެއް ދުވަހުން އަނެއް ދުވަހަށް ކަންކަން ރަނގަޅުކުރަމުންދާނެ ކަމަށެވެ.
ގާތްގަނޑަކަށް 4،000 ޓަނުގެ ތެޔޮ އުފުލޭނެ ދެ ބާޖު ބޭނުންކޮށްގެން ފަށާ ހިދުމަތާ އެކު މުސްތަގުބަލުގައި އެ ސަރަހައްދުގައި ސްޓޯރޭޖު ވެސް ގާއިމް ކުރާނެ އެވެ.
އުތުރުގެ ސަރަހައްދަކީ ބައިނަލްއަގުވާމީ ކަނޑު ދަތުރުތަކުގައި މުހިންމު ސަރަހައްދަކަށްވާއިރު، އުތުރުގައި ބަންކަރިން އާއި މެރިޓައިމްގެ ހިދުމަތްތައް ފޯރުކޮށްދޭން ފެށުމަކީ ރާއްޖެއަށް ބޮޑު ފައިދާއެއް ކުރާނެ ކަމެއް ކަމަށް ސަރުކާރުން ބުނެ އެވެ.
އިހަވަންދިއްޕޮޅުގައި ބައިނަލްއަގްވާމީ ބަންކަރިން މަޝްރޫއެއް ހިންގަން އެސްޓީއޯއިން ހަކަތައިގެ ވިޔަފާރިކުރާ ދުނިޔޭގެ އެންމެ ބޮޑު އަމިއްލަ ކުންފުނި، ވިޓޯލްއާ އެކު އެމްއޯޔޫއެއްގައި ސޮއިކުރީ 13 މާޗު 2024ގަ އެވެ.
