މި ފިލްމު އޮލިމްޕަހުގައި އަޅުވަނީ މި މަހުގެ ފަހު ހަފުތާގައި ލިބޭ ފުރަތަމަ ޓާމު ޗުއްޓީގަ އެވެ. އެ ބަންދުގައި 10 ދުވަހު، ކޮންމެ ދުވަހަކު ދެ ޝޯ އޮލިމްޕަހުގައި އަޅުވާނެ އެވެ.
ވީހާ ވެސް ގިނަ ކުޑަކުދިންނަށް ފިލްމު ބެލުމުގެ ފުރުސަތު ދިނުމުގެ ގޮތުން ޝޯތައް އޮންނާނީ މެންދުރު 2:00 އާއި ހަވީރު 4:00 ގަ އެވެ. ޝޯތަކަށް މިހާރު ވަނީ ޓިކެޓް ބުކް ކޮށްދޭން ފަށައިފަ އެވެ.
ދަ މޫވީ ފިލްމު ޕްރިމިއާކުރަން ހަމަޖެހިފައިވަނީ މި މަހުގެ 26ގަ އެވެ.
"ރޮބޯމޭން: ދަ މޫވީ" ޕްރޮޑިއުސްކުރާ އޯކޭޒްއިންކްގެ ވެރިޔާ މުހައްމަދު މުންތަސީރް (މުންކޮ) ބުނި ގޮތުގައި، މި ފިލްމު ތައްޔާރުކޮށްފައި ވަނީ އާއިލާގެ އެންމެ އެކުގައި ގޮސް ބަލައިލެވޭނެ ގޮތަށް އަދި ހާއްސަކޮށް ކުޑަކުދިންނަށް ވަރަށް ކަމުދާނެ ގޮތަށެވެ. މި ފިލްމުގެ ކާސްޓުގައި ވެސް ވަރަށް ގިނަ ކުޑަކުދިން ހިމެނެ އެވެ.
ރޮބޯމޭންއަކީ މީގެ އަށެއްކަ އަހަރު ކުރިން ކުޑަކުދިންގެ ހަފުލާތަކާއި މުނިފޫހިފިލުވުމުގެ އެކި އިވެންޓުތަކުން އާންމުންނަށް ފެންނަން ފެށި ކެރެކްޓާއެކެވެ. މޫނު ފޮރުވަން އަޅި ކުލައިގެ ހާއްސަ މާސްކެއް އަޅައިގެން ހުންނަ ރޮބޯމޭންއަކީ އަސްލު ކާކު ކަމެއް ނޭނގެ އެވެ.
ކުޑަކުދިން ވަރަށް ޝައުގުވެރިވާ ވާނެ ގޮތަށް ގެނެސްދޭ މި ފިކްޝަނަލް އަދި ޓައިމް ޓްރެވަލް ފިލްމުގައި ދެ ޒަމާނެއް ދައްކާނެ އެވެ. އެއީ މި އަހަރާއި 2040 ވަނަ އަހަރު ހިނގާ ކަންތައްތަކެކެވެ. މުޅި ވާހަކަ ބިނާވަނީ "ދަ ރޮބޯ ޖޫނިއާ ޗެލެންޖު" ކިޔާ ކުޑަކުދިންގެ ނެށުމުގެ މުބާރާތެއްގައި ބައިވެރިވާ ކުދިންތަކެއް މެދުގައި ހިނގާ ކަންތައްތަކެއްގެ މައްޗަށެވެ.
މި ފިލްމާ ބެހޭ އެންމެ ފަހުގެ މައުލޫމާތާއި ފިލްމުގެ ބައެއް މަންޒަރުތައް ފިލްމަށް ހާއްސަ ފޭސްބުކް އަދި އިންސްޓަގްރާމް މެދުވެރިކޮށް ލިބޭނެ އެވެ. ޓިކެޓް ގަތުމަށާއި އިތުރު މައުލޫމާތު ހޯދަން 7656000އަށް ގުޅުން އެދެމެވެ، މި ފިލްމު އަތޮޅު ތެރޭ އެޅުވުމަށް ގުޅުއްވާނީ 7777968 އަށެވެ.
