ރާއްޖޭގައި އަލަށް ބަންކަރިން ހިދުމަތް ފެށުމަށް ބޭއްވި ރަސްމިއްޔާތުގައި ވާހަކަފުޅު ދައްކަވަމުން މިނިސްޓަރު ސައީދު ވިދާޅުވީ، ރާއްޖޭގެ ތާރީހުގައި ވެސް އެންމެ ބޮޑު ދަރަންޏެއް ދައްކަން ޖެހިފައި އޮތީ މި ސަރުކާރަށް ކަމަށެވެ. އަދި ހަމައެކަނި ޓޫރިޒަމުން ލިބޭ މަންފާއަށް އެކަނި ބަރޯސާވެގެން ޤައުމު ވެއްޓިފައި އޮތް އިގްތިސާދީ އަނދަވަޅުން ސަލާމަތް ނުކުރެވޭނެ ކަމަށް އެމަނިކުފާނު ފާހަގަކުރެއްވިއެވެ.
މިނިސްޓަރު ސައީދު އިތުރަށް ވިދާޅުވީ، ރާއްޖެއަށް މަންފާވާނެ އެހެން ގޮތްތައް ހޯދައިގެން ރައީސުލްޖުމްހޫރިއްޔާގެ އިރުޝާދުގެ ދަށުން މި ސަރުކާރުން މަސައްކަތް ކުރަމުން އަންނަނީ ޓޫރިޒަމް ނޫން އެހެން ދާއިރާތައް ފައްކާކުރުމަށް ކަމަށެވެ. މިގޮތުން ބަންކަރިންގ ހިދުމަތަކީ ރާއްޖޭގެ އިގްތިސާދު ފުޅާކުރުމަށް އެޅޭ މުހިންމު ފިޔަވަޅެއް ކަމުގައި އެމަނިކުފާނު ފާހަގަކުރެއްވިއެވެ.
އެހެންނަމަވެސް، ބައެއް ފަރާތްތަކުން މި ހިދުމަތަށް ހަޖޫޖަހައި، ބޭރުގެ ކުންފުނިތަކުން ރާއްޖޭގައި މިކަން ނުކުރުމަށް އިލްތިމާސްކޮށް، ރައްޔިތުންގެ ހިތުގައި ޝައްކު އުފެއްދުމަށް މަސައްކަތްކުރަމުންދާކަން މިނިސްޓަރު ސަޢީދު ފާހަގަކުރެއްވިއެވެ. މިފަދަ ޢަމަލުތަކަކީ ޤައުމިއްޔަތާ ދެކޮޅު ޢަމަލުތަކެއް ކަމަށް އެމަނިކުފާނު ވިދާޅުވިއެވެ.
ނިންމާލަމުން މިނިސްޓަރު ސަޢީދު ވިދާޅުވީ، ބަންކަރިން ހިދުމަތް ފެށުމަކީ ރާއްޖޭގެ އިގްތިސާދު އިތުރަށް ފުޅާކޮށް، ވަޒީފާގެ އިތުރު ފުރުސަތުތައް އުފެއްދުމަށް އެޅޭ މުހިންމު ފިޔަވަޅެއް ކަމަށެވެ. އަދި މި މަޝްރޫއުގެ ސަބަބުން ރާއްޖެއަށް އިތުރު އިންވެސްޓްމަންޓްތައް ޖަލްބުވެ، އިޤްތިސާދީ ކުރިއެރުން ލިބިގެންދާނެ ކަމުގެ ޔަގީންކަން އެމަނިކުފާނު ދެއްވިއެވެ.
