އެންޓިކޮރްޕަޝަން ކޮމިޝަންގެ ނައިބްރައީސް އާއި ސިވިލް ސާވިސް ކޮމިޝަންގެ ރައީސް އާއި އިލެކްޝަންސް ކޮމިޝަންގެ ނައިބު ރައީސް މަގާމުން ވަކިކުރުމުގެ މައްސަލަ މަޖިލީހުން ކޮމެޓީއަށް ފޮނުވީ މި މަހުގެ 12ވަނަ ދުވަހުއެވެ.
އެ ކޮމެޓީ އިއްޔެ ބޭއްވި ބައްދަލުވުމުގައި ވަނީ އޭސީސީގެ ނައިބު ރައީސްގެ މަގާމުގައި ހުންނެވި އަބްދުއްސަލާމް އެ ކޮމިޝަންގެ މެމްބަރު ތާހާ މުހައްމަދު މަގާމުން ވަކިކުރަން ނިންމާފައެވެ. އަދި އިލެކްޝަންސްގެ ނައިބު ރައީސް އަލީ ނަޝާތާއި އެ ކޮމިޝަނުގެ ދެ މެމްބަރުންކަމަށްވާ ޑރ. މުހައްމަދު ޒާހިރު އަދި މުހައްމަދު އާސިފްވެސް މަގާމުން ވަކިކުރަން ކޮމެޓީން ވަނީ ނިންމާފައެވެ.
ސަލާމާއި ތަހާ މަގާމުން ވަކިކުރަން ނިންމުމުން އެ މެމްބަރުން މިއަދު ވަނީ އޭސީސީން އިސްތިއުފާދެއްވާފައެވެ.
އިލެކްޝަންސް ކޮމިޝަންގެ ތިން މެމްބަރަކު މަގާމުން ވަކިކުރަން ކޮމެޓީން ނިންމި ނަމަވެސް މިއަދު މަޖިލީހުން ފާސްކުރީ ޑރ ޒާހިރު އީސީގެ މެމްބަރެއްގެ ގޮތުގައި ބަހައްޓާށެވެ. މަގާމުން ވަކިކުރަން މަޖިލީހުން ފާސްކުރީ ނަޝާތާއި އާސިފެވެ.
ޑރ. ޒާހިރު މަގާމުން ވަކިނުކުރަން މަޖިލީހުގެ 70މެމްބަރުން ވޯޓް ދެއްވިއިރު އޭނާގެ މައްޗަށްވެސް ކޮށްފައިވަނީ ނަޝާތާއި އާސިފުގެ މައްޗަށް ކުރި ތުހުމަތުތަކެވެ. އެއީ އިލެކްޝަންސް ކޮމިޝަންގެ ޑޭޓާބޭސް އިން މައުލޫމާތު ނަގައި އެއިން އެޕްލިކޭޝަން ހަދައިގެން ވިއްކާ އަދި އާންމު ރައްޔިތުންގެ މައުލޫމާތު ވިއްކުން ފަދަ ބޮޑެތި ތުހުމަތުތަކެކެވެ.
