އިހަވަންދޫގައި އޮތް ރަސްމިއްޔާތެއްގައި މި އެއްބަސްވުމުގައި އެމްޕީއެލްގެ ފަރާތުން ސޮއިކުރެއްވީ އެ ކުންފުނީގެ ސީއީއޯ މުހައްމަދު ވަޖީހް އިބްރާހިމެވެ. އިހަވަންދޫ ކައުންސިލްގެ ފަރާތުން ސޮއިކުރެއްވީ އެ ކައުންސިލްގެ ރައީސް އަހްމަދު ސޮބާހް އެވެ.
އެއްބަސްވުމުގައި ސޮއިކުރެއްވުމަށް ފަހު ވަޖީހް ވިދާޅުވީ އިހަވަންދޫގައި ތަރައްޤީކުރާ ޑޮކްޔާޑާއި ސްލިޕްވޭއަކީ އުތުރުގައި ދޭ މެރިޓައިމްގެ ހިދުމަތްތަކުގެ މުހިންމު ބައެއް ކަމެކެވެ. އަދި ލަސްތަކެއް ނުވެ ޑޮކްޔާޑާއި ސްލިޕްވޭގެ އަމަލީ މަސައްކަތް ފަށާނެކަމަށްވެސް ވަޖީހް ވިދާޅުވިއެވެ.
ވަޖީހް ވިދާޅުވީ އުތުރުގައި މެރިޓައިމްގެ ހިދުމަތްތައް އަދި ފުރިހަމަ ނުވިނަމަވެސް އެކަން ކާމިޔާބުވާނެކަމުގެ ޔަގީންކަން އެބައޮތް ކަމަށެވެ.
އުތުރުގައި ފެށި ބަންކަރިންގެ ހިދުމަތުގައި ތެޔޮ އެޅުން ފިޔަވާ ބޯޓްތަކަށް ދޭންޖެހޭ އެހެން ހުރިހާ ހިދުމަތްތައް ދޭނީ އެމްޕީއެލުންނެވެ. އެކުންފުނިން އިއްޔެ ވަނީ ބަންކަރިންނަށް ބޭނުންވާ ފެން ބާޖު ތުރާކުނުގައި ބޭއްވުމަށް އެކަމުގެ އެއްބަސްވުމުގައި ސޮއިކޮށްފައެވެ.
