ހައުސިން މިނިސްޓްރީން އާންމުކުރި ޕޯސްޓެއްގައި ބުނީ މިވަގުތާހަމައަށް ގަމުގައި އިމާރާތްކުރަމުންދާ 100 ހައުސިން ޔުނިޓްގެ 63 އިންސައްތަ ނިމިފައިވާކަމަށެވެ.
ސަރުކާރުން އެސްޖޭ ކޮންސްޓްރަކްޝަންއާ ހަވާލުކޮށް ގަމުގައި 100 ހައުސިން ޔުނިޓް އެޅުމުގެ މަސައްކަތް ފެެށީ 2022 ވަނަ އަހަރުއެވެ. އަދި ކޮންމެ ހައުސިން ޔުނިޓެއްގައި 1000 އަކަފޫޓު ހުންނައިރު މި މަޝްރުއުގެ އަގަކީ 84.4 މިލިއަން ރުފިޔާއެވެ.
މިދިޔަ އޭޕްރީލް މަހު ލ.އަތޮޅަށް ރައީސް ޑރ.މުއިއްޒު ކުރެއްވި ދަތުރުފުޅުގައި އެމަނިކުފާނު ވަނީ ގަމަކީ ވެސް ބޯހިޔާވަހިކަމުގެ މައްސަލަ ދިމާވެފައިވާ ރަށަކަށްވާތީ މިހާރު ވެސް 100 ހައުސިން ޔުނިޓް އެޅުމުގެ މަސައްކަތް ކުރާ ކަމަށާއި އެކަމަކު އެއީ މި ރަށަށް ފުދޭ މިންވަރު ނޫން ކަމަށް ވިދާޅުވެފައެވެ. އެހެންވެ ސަރުކާރުން ފަސް އަހަރުގެ ތެރޭގައި 40،000 ހައުސިން ޔުނިޓް އެޅުމަށް ކުރާ މަސައްކަތުގައި އެ ރަށުގެ އަދަދު އިތުރުކުރައްވާނެ ކަމަށް ރައީސް ވިދާޅުވި އެވެ.
ރައީސް ވަނީ ގަމުން މީގެ އަހަރުތަކެއް ކުރިން ދޫކޮށްފައިވާ ގޯތިތަކުގެ ސައިޒް ބޮޑުކޮށްދޭން ރަށުގެ ރައްޔިތުން ކައުންސިލުގައި އެދިފައިވާތީ އެކަން ވެސް ކަމާ ގުޅޭ އިދާރާތަކާ މަޝްވަރާކުރުމަށް ފަހު ކޮށްދެއްވާނެ ކަމުގެ ޔަގީންކަން ދެއްވައިފައެވެ.
