މީގެ ކުރިން އެމްއެސްއެސް އިން މި ހިދުމަތް ދެމުން ގެންދިޔައީ ހަމައެކަނި ސިންގަޕޫރު ބަނދަރުންނެވެ. ނަމަވެސް މިހާރު އެ ކުންފުނިން ވަނީ އިންޑޮނޭޝިއާގެ ސުމަތްރާގެ ޕޯޓް އޮފް ބެލަވަން ބަނދަރާއި، މެލޭޝިއާގެ މައި ބަނދަރު ކަމަށްވާ ޕޯޓް ކަލަންގް އަދި މި ސަރަހައްދުގެ މައި ބަނދަރު ކަމަށްވާ ސްރީލަންކާގެ ކޮލަމްބޯ ބަނދަރާ ދެމެދު ގުޅުން ގާއިމްކޮށްފައެވެ.
އެމްއެސްއެސްގެ މެނޭޖިން ޑިރެކްޓަރު އަހުމަދު ޝަރީފު މިއަދު މީޑިއާތަކާ ވާހަކަ ދައްކަވަމުން ވިދާޅުވީ ބެލަވަން ބަނދަރާއި ކޮލަމްބޯއާ ދެމެދު ދަތުރު ފެށުމުން އެނގިގެންދަނީ ކުންފުނީގެ އޮޕަރޭޝަން މަޑުމަޑުން ފުޅާވަމުންދާ ކަމެވެ. މިއީ ކުންފުންޏަށް ލިބިގެންދިޔަ ކާމިޔާބީއެއް ކަމަށް އޭނާ ފާހަގަކުރެއްވިއެވެ. މި ދަތުރުތަކުގައި ބޭނުންކުރާނީ އެމްއެސްއެސް ގްރެފިން ކަމަށްވެސް ޝަރީފު ވިދާޅުވިއެވެ.
އިތުރަށް ޝަރީފު ވިދާޅުވީ ދެކުނު އޭޝިއާގެ ރޫޓަށް ދަތުރުތައް ފުޅާކުރާއިރު، މި ސަރަހައްދުން ރާއްޖެއަށް މުދާ ގެނައުމުގެ ފުރުސަތުގެ ބޭނުންވެސް ހިފޭނެ ކަމަށެވެ. އަދި އެމްޕީއެލް، އެމްއޭސީއެލް އަދި ކަސްޓަމްސް ގުޅިގެން ފަށާފައިވާ ސީ-އެއަރ ކާގޯގެ ޑިމާންޑް އުފުލެމުންދާތީ، އެކަމަށްވެސް އެ ކުންފުނިން ތައްޔާރުވެފައިވާ ކަމަށް އޭނާ ހާމަކުރެއްވިއެވެ.
ދެހާ ވިހި ވަނަ އަހަރު އުފެދުނު ގައުމީ ބޯޓު ކުންފުނިން ވަނީ ކޮވިޑްގެ ދަތި ދުވަސްވަރުގައި ރާއްޖެއަށް ބޭނުންވާ މުދާ ގެނައުމުގައި މުހިންމު ދައުރެއް އަދާކޮށްފައެވެ. މިހާރު އެ ކުންފުންޏަކީ ރާއްޖެއަށް ގެންނަ މުދަލުގެ 90 ޕަސެންޓް ހިއްސާކުރާ ކުންފުންޏެވެ.
