ހައުސިން މިނިސްޓްރީން ކުރި ޕޯސްޓެއްގައި ބުނީ މިއަދާހަމައަށް ދިއްދޫގައި ގާއިމްކުރަމުންދާ 75 ހައުސިން ޔުނިޓްގެ 75 އިންސައްތަ ނިމިފައިވާކަމަށެވެ.
ހއ. ދިއްދޫގައި ސަރުކާރުން އަޅަމުންދާ 75 ހައުސިން ޔުނިޓް އެޅުމުގެ މަސައްކަތަކީ 2022 ވަަނަ އަހަރު "އެސްޖޭ ކޮންސްޓްރަކްޝަން" އާއި ހަވާލުކޮށްކޮށްގެން ކުރިއަށްގެންދާ މަޝްރޫއެކެވެ. އެއީ 120.4 މިލިއަން ރުފިޔާގެ މަޝްރޫއެއްކަމަށް ހައުސިން މިނިސްޓްރީން މައުލޫމާތުދެއެވެ.
މި ހައުސިން ޔުނިޓުތަކުގައި 700 އަކަފޫޓުގެ ރޯ ހައުސް ތަކެއް ހުންނާނެ ކަމަށާއި، ކޮންމެ ހައުސިން ޔުނިޓެއްގައި ތިން ކޮޓަރި، ތިން ފާހާނާ ހިމެނޭނެ ކަމަށް ހައުސިން މިނިސްޓްރީން ވަނީ ބުނެފަ އެވެ. އަދި ސިޓިންރޫމާއިއެކު ބަދިގެ، ކާގެ، ލޯންޑަރީ އަދި ސްޓޯ ރޫމް ހިމެނޭނެ ކަމަށްވެސް ވަނީ ބުނެފައެވެ.
މީގެ އިތުރުން ހައުސިން ޔުނިޓުތަކުގައި ދިރިއުޅޭ ފަރާތްތަކަށް ހިތްފަސޭހަ މާހައުލެއް ގާއިމް ކުރުމަށްޓަކައި ވަށައިގެން އަލިކޮށް، ޕާކަކާއި، ވެހިކްލަ ޕާކު ކުރާނެ ސަރަހައްދެއް ތަރައްގީ ކުރުމަށް ވަނީ ހަމަޖެހިފައެވެ.
