ބައިނަލްއަގުވާމީ އެއްވެސް އެއާލައިނެއްގެ މެނޫގައި ދިވެހި ކެއުމެއް ހިމަނާފައި ނުވާކަން ފާހަގަކުރައްވައި، މިކަން ބަދަލުކުރުމަށް ހޮސްޕިޓާލިޓީ ދާއިރާގެ ތަޖުރިބާކާރުންގެ އެހީތެރިކަމަށް އިކޮނޮމިކް މިނިސްޓަރު މުހައްމަދު ސައީދު އެދިވަޑައިގެންފިއެވެ.
Advertisement
ދަރުބާރުގޭގައި މިއަދު ފެށުނު ފުޑް އެންޑް ހޮސްޕިޓާލިޓީ އޭޝިއާ އެގްޒިބިޝަންގެ ފެށުމުގެ ރަސްމިއްޔާތުގައި ވާހަކަފުޅު ދައްކަވަމުން މިނިސްޓަރު ސައީދު ވިދާޅުވީ، ރާއްޖޭގެ ޓޫރިޒަމް ދުނިޔޭގެ އެންމެ މަތީ ފެންވަރަށް ގޮސްފައިވީ ނަމަވެސް، ރާއްޖެއަށް ދަތުރުކުރާ އެއްވެސް އެއާލައިނެއްގެ މެނޫގައި ދިވެހި ކެއުމެއް ނުހިމެނޭ ކަމަށެވެ.
"ރާއްޖެއަށް ދަތުރުކުރާ އެއާލައިންތަކުން ފަސިންޖަރުންނަށް މެނޫ ހިއްސާކުރާއިރު އެހެން އެކި ގައުމުތަކުގެ ކެއުންތައް ހިމަނާފައި ހުންނަތަން ފެނުމުން މާޔޫސްވާ،" ކަމަށް ސައީދު ވިދާޅުވިއެވެ.
މި މައްސަލައަށް ހައްލެއް ހޯދުމަށް، މިނިސްޓަރު ސައީދު ވަނީ އެގްޒިބިޝަންގައި ބައިވެރިވާ ތަޖުރިބާކާރުންގެ އަރިހުން އެދިލައްވާފައެވެ.
މިނިސްޓަރު ސައީދު
"މި އެގްޒިބިޝަންގައި މިކަމާ މެދު ވިސްނުމަށް އެންމެ ރަނގަޅު ތަޖުރިބާކާރުން އެބަތިބި. ކައިރި މުސްތަގުބަލެއްގައި ތަޖުރިބާކާރުންގެ އުފެއްދުންތެރިކަމާ އެކު އަދި އެފްއެޗްއޭއެމްގެ އިސްނެންގެވުމާއިއެކު، މަޝްވަރާތަކާއިއެކު މިކަމުގެ ހިޔާލެއް އަދި މިކަން ކުރެވިދާނެ ގޮތެއް ގެނެވިދާނެ އެއަރލައިންތަކުގައި މެނޫ ތައްޔާރުކުރާ ޝެފުންނާ ވެސް އެކު،" މިނިސްޓަރު ސައީދު ވިދާޅުވިއެވެ.
މިއަހަރުގެ ފުޑް އެންޑް ހޮސްޕިޓަލިޓީ އޭޝިއާ މޯލްޑިވްސް ކުރިއަށްދަނީ މިއަދުން ފެށިގެން ބުދަ ދުވަހުގެ ނިޔަލަށެވެ. މި އެގްޒިބިޝަންގައި ކާބޯތަކެތި ވިއްކާ 120 ފަރާތަކުން ބައިވެރިވެއެވެ. އަދި އެގްޒިބިޝަންގެ ހަވާސާގައި ބާއްވާ ކާތަކެތި ތައްޔާރުކުރުމުގެ މުބާރާތް، ކަލިނަރީ ޗެލެންޖްގައި 600 އަށްވުރެ ގިނަ ކެއްކުންތެރިން ބައިވެރިވެއެވެ.
