މިމަހުގެ 22 ވަނަ ދުވަހު ފެށި މި މަސައްކަތަކީ 19 ދާއިރާއަކަށް ބަހާލައިގެން ކުރިޔަށް ގެންދާ ސާވޭއެއްކަމަށް މާލޭ ސިޓީ ކައުންސިލް އިން ބުނެއެވެ.
މަގުތަކުގެ ސާވޭގެ މަސައްކަތް ނިމޭއިރު، މާލޭގެ މަގުތަކުގައި ހުރި މައްސަލަތައް ޑިޖިޓަލްކޮށް ފެންނާނެއެއް ކަމަށް މާލޭ ސިޓީ ކައުންސިލް އިން މައުލޫމާތުދެއެވެ. އެގޮތުން ހަލާކުވެފައި ހުރި މަގުތަކާއި ކާނުތަކާއި ދުވާރުތަކާއި އަދި އިމާރާތް ކުރުމުގެ ގަވާއިދާ ހިލާފަށް މަސައްކަތް ކުރަމުންދާ ތަންތަން ވެސް ޑިޖިޓަލްކޮށް ފެންނާނެ ކަމަށް މާލޭ ސިޓީ ކައުންސިލްއިން ބުނެއެވެ.
މި މަސައްކަތުގައި ސިޓީ ކައުންސިލުގެ ކައުންސިލަރުން ދަނީ އަމަލީ ގޮތުން ކައުންސިލުގެ މުއައްޒަފުންނާއި އެކު ހަރަކާތްތެރިވަމުންކަމަށް ފާހަގަކޮށް އެ ކައުންސިލްއިން ބުނީ މިހާރު ފެށިފައިވާ މި މަސައްކަތުގެ ތެރޭގައި މާލޭގެ ސްކޫލްތަކުގެ ކައިރީގައި ހުރި ކާނުތައް ސާފުކުރުމާއި ހަލާކުވެފައި ހުރި މަގުތަކާއި ދުވާރު ތަކާއި ކާނުތައް މަރާމާތު ކުރުން ހިމެނޭކަމަށެވެ.
މި މަސައްކަތުގެ ސަބަބުން މަގުތަކުގައި ހިނގައި އުޅޭ މީހުންނާއި ދުއްވާ އުޅަދުތަކަށް މިހާރު ކުރިމަތިވާ މައްސަލަތަކަށް ކޮށްމެވެސް ވަރެއްގެ ހައްލެއް ލިބިގެންދާނެ ކަމަށް ސިޓީ ކައުންސިލްއިން ފާހަގަކުރެއެވެ. އަދި މި ސާވޭ ނިމި، ޖިޑިޓަލްކޮށް މާލޭގެ މަގުތަކުގެ ހާލަތު ބެލޭނެ ނިޒާމު ގާއިމްވުމުން، މަގުތަކުގެ ހާލަތު ފަސޭހަކަމާއެކު ދެނެގަނެވި، ކުރިމަތިވާ މައްސަލަތައް ހައްލު ކުރުމުގެ މަސައްކަތް ވަރަށް ބޮޑަށް އަވަސްވެގެންދާނެ ކަމަށް ސިޓީ ކައުންސިލްއިން ބުނެއެވެ.
