"ފަތުވެރިކަމުގެ ބޭނުންތަކަށް ދޫކޮށްފައިވާ ތަންތަން ތަރައްގީކުރުމަށް ދީފައިވާ މުއްދަތު އިތުރުކޮށްދިނުމާއި ކުއްޔާއި ޖޫރިމަނާ ފަސްކޮށްދިނުމުގައި އަމަލު ކުރާނެ ގޮތުގެ ގަވައިދު" ކުރިން އޮންނަ ގޮތުން ތަރައްގީ ކުރަން ރިސޯޓެއް ބަންދުކުރަން ހުއްދަ ދެވެނީ ފުރަތަމަ ފަހަރު ގިނަވެގެން ދެ އަހަރުގެ މުއުދަތަކަށެވެ. އަދި %50 މަސައްކަތް ފުރިހަމަކޮށްފައިވާނަމަ، އިތުރު އެއް އަހަރަށް މުއްދަތު ދިގު ދެންމުމުގެ ފުރުސަތު އެ ގަވައިދުން ވަނީ ދީފައެވެ.
ގަވައިދަށް މިހާރު ގެނައި ބަދަލުގައިވާ ގޮތުން ތަރައްގީ ކުރަން ރިސޯޓެއް ބަންދުކުރަން ހުއްދަ ދެން ދޭނީ ގިނަވެގެން 36 މަސް ދުވަސް ނުވަތަ ތިން އަހަރުގެ މުއްދަތަކަށް ކުލި ފަސްވާ ގޮތަށްކަމަށެވެ. އަދި ތިން އަހަރާ ބައިގެ މުއްދަތަކަށް ކުލި ފަސްވާ ގޮތަށް ހުއްދަ ދޫކުރުމުގެ އިހްތިޔާރު މިނިސްޓްރަށް ދީފައިވެއެވެ.
ގަވައިދު ބުނާގޮތުން ރިސޯޓް ތަރައްގީކުރާ ރަށެށް ނުވަތަ އެފަދަ ބޭނުމަކަށް ދޫކޮށްފައިވާ ބިމެއްގެ ކޮންސްޓްރަކްޝަން މުއްދަތު އިތުރުކޮށްދެވޭނެ އެންމެ ދިގު މުއްދަތަކީވެސް ތިން އަހަރެވެ. ފަޅެއްގެ ކޮންސްޓްކްޝަން މުއްދަތު އިތުރުކޮށްދެވޭނެ އެންމެ ދިގު މުއްދަތަކީ، ހަތަރު އަހަރެވެ.
