އެޗްޕީއޭއިން ބުނީ އާރުއެސްވީ ކުޑަކުދިންގެ ތެރޭގައި އިތުރުވާތީ އެކަން ވަރަށް ގާތުން ބަލަމުންއަންނަކަމަށެވެ.
(އާރުއެސްވީ) ވައިރަހަކީ ގައިން ގަޔަށް އަރާ ވައިރަހެކވެ. އަދި މި ވައިރަސް ބޮޑަށްް ފެތުރެނީ ކުޑަކުދިންގެ ތެރޭގަެއެވެ. މި ވައިރަސް އެކަކު ގައިން އަނެއްކަކުގެ ގަޔަށް އަރަނީ އާއްމުކޮށް ކެއްސުމާއި ކިނބިހި އެޅުމުގެ ތެރޭގައެވެ.
ބަލީގެ އަލާމާތްތައް
- ރޯގާ
- ކެއްސުން
- ނޭވާލާން އުނދަގޫވުން
- ބުރަކަށީގައި ރިއްސުން
މިއިން އެއްވެސް އަލާމާތްތައް ފެނިއްޖެނަމަ ލަސްނުކޮށް ވަގުތުން ފަރުވާ ހޯދުމަށް އެޗްޕީއޭއިން އިލްތިމާސްކުރެއެވެ. އަދި މީ އަވަހަށް ދެނެގަނެ، ފަރުވާ ދިނުމުން ނަތީޖާ ވަރަށް ބޮޑަށް ރަނގަޅުކުރެވިދާނެކަމަށްވެސް އެޗްޕީއޭއިން ބުނެއެވެ.
މި ބަލި ފެތުރު ނުދިނުމަށް އަޅަންޖެހޭ ރައްކާތެރިކަމުގެ ފިޔަވަޅުތައް އެޅުމަށްވެސް އެޗްޕީއޭއިން ވަނީ އިލްތިމާސްކޮށްފައެވެ. އެގޮތުން މީހުން އެއްވެ އުޅޭ ތަންތަނަށް ނުދިޔުމަށް އެޗްޕީއޭއިން އިލްތިމާސްކުރެއެވެ. މީގެއިތުރުން އަތްދޮވުމަކީވެސް މި ބަލިން ރައްކާތެރިވުމަށް ެއެޅިދާނެ ފިޔަވަޅެއް ކަމަށް އެޗްޕީއޭއިން ބުނެއެވެ.
