މިދިޔަ އަހަރު ޓޫރިޒަމް ދާއިރާއިން ރިސޯޓުތަކަށް 4.5 ބިލިއަން ޑޮލަރުގެ އާމްދަނީއެއް ލިބުނު ނަމަވެސް، ބޭންކްތަކަށް ޖަމާކޮށްފައިވަނީ އޭގެ ތެރެއިން 2.3 ބިލިއަން ޑޮލަރު އެކަނި ކަމަށް އެމްއެމްއޭ އިން ބުނެފައިވެއެވެ.
އެމްއެމްއޭ އިން އިތުރަށް ފާހަގަކޮށްފައިވާ ގޮތުގައި، ބޭންކްތަކަށް ޖަމާކުރާ ޑޮލަރު މަދުވި ނަމަވެސް ފަތުރުވެރިކަމުން ރިސޯޓުތަކަށް ލިބޭ އާމްދަނީ އަންނަނީ އިތުރުވަމުންނެވެ. މިސާލަކަށް، 2019 ވަނަ އަހަރު ރިސޯޓުތަކަށް އާމްދަނީގެ ގޮތުގައި 3.4 ބިލިއަން ޑޮލަރު ލިބުނުއިރު، އޭގެ ތެރެއިން 2.5 ބިލިއަން ޑޮލަރު (74 ޕަސެންޓް) ބޭންކްތަކަށް ޖަމާކޮށްފައިވެއެވެ.
މީގެ އިތުރުން، ބޭންކްތަކަށް ރިސޯޓުތަކުން ޑޮލަރު ވިއްކާ އަދަދުވެސް ވަނީ ދަށަށް ގޮސްފައެވެ. މިދިޔަ އަހަރު ރިސޯޓުތަކުން ބޭންކްތަކަށް ވިއްކީ 68 މިލިއަން ޑޮލަރު ކަމަށްވާއިރު، 2019 ވަނަ އަހަރު މި އަދަދު 153 މިލިއަން ޑޮލަރުގައި ހުރިކަން ފާހަގަކުރެވެއެވެ.
މި ތަފާސްހިސާބުތަކުން ދައްކާ ގޮތުގައި، ފަތުރުވެރިކަމުގެ ދާއިރާއިން ލިބޭ އާމްދަނީ އިތުރުވަމުންދާއިރު، ބޭންކިން ސިސްޓަމަށް ވަންނަ ބޭރު ފައިސާގެ އަދަދު ދަށަށްދާކަން ފާހަގަކުރެވެއެވެ.
