އިއްޔެ ގެޒެޓުކުރި އިސްލާހުގައި، މި އުޅަނދުފަހަރުގެ އެޖެންޓުކަން ކުރެވޭނީ ހަމައެކަނި ދިވެހި ކުންފުނިތަކަށް ކަމަށް ބަޔާންކޮށްފައިވެއެވެ.
އާ ގަވާއިދުގެ ދަށުން، އެޖެންޓުކަން ކުރާ ކުންފުނީގެ ހިއްސާދާރުންގެ ގޮތުގައި ތިބެންވާނީ ހަމައެކަނި ދިވެހިންނެވެ. މީގެ އިތުރުން، އެޖެންޓުކަން ކުރާ ކުންފުންޏެއްގައި އެހެން ވިޔަފާރިއެއް ހިމެނޭނަމަ، އެ ވިޔަފާރީގެ މިލްކުވެރިންވެސް ވާންޖެހޭނީ ދިވެހިންނަށެވެ.
އިސްލާހުގައި އިތުރަށް ބަޔާންކޮށްފައިވާ ގޮތުގައި:
- ބޭރުގެ ޓޫރިސްޓު އުޅަނދުފަހަރަށް ރާއްޖެ އެތެރެވެވޭނީ ރާއްޖޭގެ އެޖެންޓެއް މެދުވެރިކޮށެވެ.
- އުޅަނދުފަހަރުގެ ފަޅުވެރިންނާއި ފަސިންޖަރުންނަށް އެކްސްކާޝަންތަކުގައި ބައިވެރިވެވޭނީ ހުއްދަ އޮންނަ ދިވެހި ޓުއާ ގައިޑަކާ އެކުގައެވެ.
ގަވާއިދަށް ގެނެވުނު ބަދަލުތަކުގެ ތެރޭގައި، ފަސިންޖަރު ލައިސަންސްގެ އަގުތަކަށް ވެސް ބަދަލު ގެނެސްފައިވެއެވެ. އުޅަނދުފަހަރުގެ ދިގުމިނަށް ބަލައި، ދުވާލަކަށް 100 ޑޮލަރުން ފެށިގެން 850 ޑޮލަރާ ހަމައަށް ފީ ނެގޭނެއެވެ. އަދި އައު ފީއެއްގެ ގޮތުގައި، އުޅަނދަށް އަރާ ކޮންމެ ފަސިންޖަރެއްގެ އަތުން 5 ޑޮލަރު ނެގުމަށް ހަމަޖައްސާފައިވެއެވެ.
ކުރިން ދޫކުރަމުން އައި ޗާޓަރު ލައިސަންސްގެ ނަން "ފަސިންޖަރު ލައިސަންސް" އަށް ބަދަލުކޮށް، އުޅަނދުގެ ކުޑަބޮޑުމިނަށް ބަލައި ލިޔެކިޔުންތައް ހުށަހެޅުމުން ލައިސަންސް ދޫކުރާ ގޮތަށް ހަމަޖައްސާފައިވެއެވެ.
މި ބަދަލުތަކަކީ ރާއްޖޭގެ ޓޫރިޒަމް ދާއިރާގައި ދިވެހިންގެ ބައިވެރިވުން އިތުރުކޮށް، އާމްދަނީ އިތުރުކުރުމަށް އަމާޒުކޮށްގެން ގެނެވުނު ބަދަލުތަކެއް ކަމަށް ބެލެވެއެވެ.
