މި ދުވަސްކޮޅު ޑޮލަރުގެ އަގު އުފުލެން ދިމާވި ސަބަބަކީ ސުކޫލު ބަންދަށް ޑޮލަރަށް އޮތް ޑިމާންޑު އިހުނަށްވުރެ، ބޮޑުވުމެވެ. ފުރަތަމަ ޓާމު ޗުއްޓީއަށް މިއަދުން ފެށިގެން ހަފުތާއަކަށް ސްކޫލްތައް ބަންދުވި އިރު ޗުއްޓީއަށް ގިނަ ބަޔަކު އާއިލާއާއިއެކު ބޭރު ގައުމުތަކަށް ދަތުރު ކުރާނެ ކަމަށް ބެލެވެ އެވެ.
މިއަދު މޯލްޑިވިއަން އިން ލަންކާ އަށް ފުރަން ދަތުރު ހެދި ދިވެހި އާއިލާއެއްގެ އިސް މީހަކު "ސީއެންއެމް"އާ ވާހަކަ ދައްކަމުން ބުނީ ސްކޫލްތައް ބަންދުވީމަ ދަރިފުޅު ލޯ ދައްކާލަން ލަންކާ އަށް ފުރަން ޑޮލަރު ހޯދަން ޖެހުނީ ބޮޑު އަގުގައި ކަމަށެވެ. އޭނާ ބުނީ މި ނިމުނު ހަފްތާ ޑޮލަރުގެ ރޭޓަށް އަންނަ ބަދަލު ބަލަމުން ގޮސް އެންމެ ފަހުން ދިވެހި ރުފިޔާ ލިބުމުން ޑޮލަރު ގަންނަން ލިބުނީ 19.10ރ. އަށް ކަމަށެވެ.
އެ މީހާ ބުނީ 100 އަދި 200 ޑޮލަރުން ވިއްކާ މީހަކު ވެސް 19ރ. އަށް ވުރެ ކުޑަކޮށް ނުވިއްކާ ކަމަށެވެ.
ރާއްޖޭގައި އެންމެ ފުޅާ ދާއިރާއެއްގައި ޑޮލަރުގެ މުއަމަލާތް ކުރުމަށް ބޭނުންކުރާ ވައިބާ ގްރޫޕްގައި ވެސް ޑޮލަރެއްގެ އަގު މިއަދު ހުރީ 19 ރުފިޔާ އަދި 20 ރުފިޔާ ރޭޓުގަ އެވެ.
ރާއްޖެ އަށް މުދާ އިމްޕޯޓްކުރާ ވިޔަފާރިވެރިއަކު ވެސް މިއަދު ބުނީ، މިހާރު ރާއްޖޭގައި ވިޔަފާރި ކުރަނީ 18ރ. އަކީ ޑޮލަރުގެ ރަސްމީ ރޭޓު ކަމަށް ބަލައިގެން ކަމަށެވެ.
ފާހަގަކޮށްލެވޭ ގޮތުގައި، މި އަހަރު ފެށުނުއިރު ވެސް، ޑޮލަރުގެ އަގުތައް ކަޅު ބާޒާރުގައި ހުރީ 18 ރުފިޔާގަ އެވެ. ނަމަވެސް ފަހުން ދުވަސްކޮޅަކަށް އަގު ކުޑަކޮށް ދަށް ވިއެވެ. އޭރު އިކޮނޮމިކް މިނިސްޓަރު މުހައްމަދު ސައީދު ވިދާޅުވީ، ސަރުކާރުގެ އަމާޒަކީ ހަތަރު މަހެއްހައި ދުވަހުގެ ތެރޭގައި ރާއްޖެއަށް ދިމާވެފައި އޮތް ޑޮލަރުގެ މައްސަލަ ހައްލުކުރުން ކަމަށެވެ.
ޑޮލަރުގެ އަގު އުފުލިގެން އުޅެން ދެން ނުޖެހޭނެ ކަމަށާއި ދެން ފެންނާނީ ޑޮލަރުގެ އަގު ހެޔޮވަމުން ދާތަން ކަމަށް ރައީސް ޑރ. މުހައްމަދު މުއިއްޒު ވެސް ވަނީ ވިދާޅުވެފަ އެވެ. ނަމަވެސް ސަރުކާރަށް އަހަރެއް ވާން ދާއިރު ރައީސް އެ ވިދާޅުވާ ހާލަތު އަދި އުފަން ނުވެ އެވެ.
ރިސޯޓުތަކުން ބޭންކުތަކަށް ޑޮލަރު ވަންނަ މިންވަރު އެނގޭނެ ހިސާބުތަކެއް މިދިޔަ އަންގާރަ ދުވަހު އެމްއެމްއޭއިން ވަނީ އާންމުކޮށްފަ އެވެ. ހިސާބުތަކުން އެނގޭ ގޮތުގައި ރިސޯޓުތަކުން މިދިޔަ އަހަރު ބޭންކުތަކަށް މާރު ކުރީ 68 މިލިއަން ޑޮލަރެވެ. ނަމަވެސް އާމްދަނީގެ ގޮތުގައި ރިސޯޓުތަކަށް މިދިޔަ އަހަރު 4.5 ބިލިއަން ޑޮލަރު ލިބުނެވެ.
- އިތުރަށް ކިޔާލަން: ޓޫރިޒަމް އާމްދަނީ އިތުރުވިޔަސް، ބޭންކުތަކަށް ޖަމާކުރާ ޑޮލަރު ވަނީ މަދު
ރާއްޖޭގައި ޑޮލަރުގެ ރަސްމީ އަގަކީ 15:42ރ އެވެ. ނަމަވެސް މަރުކަޒީ ބޭންކް އެމްއެމްއޭ އަކީ، ޑޮލަރުގެ ތާށިކަން އަންނަ ދުވަސްވަރު ފައިސާގެ މާރުކޭޓްގެ ކޮންޓްރޯލް ހޯދޭ ފަދަ ގާބިލް އިދާރާއަކަށް ނުވާތީ، ޑޮލަރުުގެ މުއާމަލާތް ހިންގަނީ އަބަދުވެސް ކަޅު ބާޒާރުގަ އެވެ.
ގިނަ ބަޔަކު ތުހުމަތުކުރާ ގޮތުގައި ޑޮލަރުގެ ކަޅު ބާޒާރު ކޮންޓްރޯލްކުރަނީ ރާއްޖޭގެ ރިސޯޓަތަކުގެ މަހުޖަނުންނެވެ.
ޑޮލަރުގެ ކަޅު ބާާރު ނައްތާލައި ޑޮލަރު ގަނެ ވިއްކުމުގެ ނިޒާމް ރަނގަޅުކުރަން ސަރުކާރުން އަންނަނީ މަސައްކަތް ކުރަމުންނެވެ.
- އިތުރަށް ކިޔާލަން: ޑޮލަރުން ޓެކްސް ނެގޭ ގޮތަށް އިންކަމް ޓެކްސް ގަވާއިދު އިސްލާހުކޮށްފި
