ލުބްނާނުގެ ހިޒްބުﷲ ޖަމާއަތުގެ ލީޑަރު ހަސަން ނަސްރުﷲ އަވާހާރަކޮށްލުން އެކަމުގެ ހިތާމައިގައި ކުރެއްވި ޕޯސްޓެއްގައި ފައްޔާޒު ވިދާޅުވީ ނަސްރުﷲ އަވަހާރަކޮށްލުން ކުށްވެރިކުރާ ކަމަށާއި އިޒްރޭލުން މެދުއިރުމަތީގައި ހިންގަމުންދާ ޖަރީމާތަކާއި މެދު ކަންބޮޑުވާ ކަމަށެވެ.
އިޒްރޭލުގެ އަމަލުތަކުގެ ސަބަބުން ސަރަހައްދުގައި ހަމަޖެހުން ގާއިމުކުރަން ހުރަސްއެޅޭ ކަމަށާއި އިޒްރޭލުގެ ޖަރީމާތައް ހުއްޓުވަން ދުނިޔޭގައި ތިބި ހެޔޮވިސްނޭ މުސްލިމް އިސްލާމީ ލީޑަރުން އެއްބައިވަންތަ ވާންޖެހޭ ކަމަށްވެސް ފައްޔާޒު ވިދާޅުވި އެވެ.
ފައްޔާޒު އިތުރަށް ވިދާޅުވީ ދުނިޔޭގައި ތިބި ހެޔޮވިސްނޭ މުސްލިމް ލީޑަރުންނާއި ރައްޔިތުން އެއްބައިވަންތަވެ، އަދި ވިދާޅުވީ އިސްރާއިލުގެ އަމަލުތައް ހުއްޓުވަން ފިޔަވަޅު އަޅަންޖެހޭ ކަމަށެވެ.
ނަސްރުﷲ އަވަހާރަކޮށްލީ ހިޒްބުﷲގެ މަރުކަޒަކަށް އަމާޒުކޮށް އިޒްރޭލުން ރޭ ވައިގެ މަގުން ދިން ހަމަލާއެއްގަ އެވެ. ނަސްރުﷲ އަވަހާރަކޮށްލާފައިވާ ކަމަށް އިޒްރޭލުން ރެއިން ފެށިގެން ބުނަމުން ދަނިކޮށް ހިޒްބުﷲ ޖަމާއަތުން ވެސް މިއަދު ވަނީ އެކަން ކަށަވަރު ކޮށްދީފަ އެވެ.
ހިޒްބުﷲ އިން ބުނީ ނަސްރުﷲ އަވަހާރަކޮށްލި ނަމަވެސް ފަލަސްތީނުގެ ހައްގުގައި އެ ޖަމާއަތުން ކުރަމުންދާ މަސައްކަތަށް އެއްވެސް ހުއްޓުމެއް ނާންނާނެ ކަމަށެވެ.
އިސްރާއީލުން ގާޒާއަށް ދެމުންދާ ހަމަލާތަކުގައި 41500 އަށްވުރެ ގިނަ މީހުން ޝަހީދުކޮށްލާފައިވާއިރު ލުބުނާނަށް ދޭން ފެށި ހަމަލާތަކުގައި 1200 އަށްވުރެ ގިނަ މީހުން ޝަހީދުކޮށްލާފައިވާކަމަށް ބެލެވެ އެވެ.
