މި ހަފްލާ ބޭއްވުނީ ރިސޯޓުގެ ސީސޯލްޓް ބީޗުގައެވެ.
މި ހަފްލާގައި މަޑުއްވަރީ ސްކޫލުގެ ދަރިވަރުންނާއި މުދައްރިސުންގެ އިތުރުން ރަށުގެ އަންހެނުން ބައިވެރިވިއެވެ. ހަފްލާގެ މައިގަނޑު އެއް ބައިގެ ގޮތުގައި ހިމެނުނީ ދިވެހި "މަންމަ" އިން ތައްޔާރުކުރި ކެއްކުމުގެ ސްޓޭޝަންތަކެވެ. މި ސްޓޭޝަންތަކުގައި އެ "މަންމަ" އިން ދިވެހި ކާނާ ތައްޔާރުކޮށް، އެމީހުންގެ ހުނަރުވެރިކަން ދައްކާލިއެވެ.
ހަފްލާގައި ބައިވެރިވި ފަރާތްތަކަށް ތަފާތު ބާވަތްތަކުގެ ދިވެހި ކާނާ ރަހަ ބަލައިލުމުގެ ފުރުސަތު ލިބުނެވެ. މީގެ އިތުރުން ރިސޯޓުގެ ކަލިނަރީ ޓީމުން ތައްޔާރުކުރި ހާއްސަ ބުއިންތައްވެސް ތައާރަފުކުރެވުނެވެ. ހަފްލާގެ މާހައުލު އިތުރަށް ކުލަގަދަކޮށްލީ ބޮޑުބެރު ފަދަ ދިވެހި ރާގުތަކުންނެވެ.
މަޑުއްވަރީ ސްކޫލުގެ ޕްރިންސިޕަލް އަބްދުﷲ ހަލީމް ވިދާޅުވެފައިވަނީ މިފަދަ ޕާޓްނަރޝިޕްތަކަކީ ދަރިވަރުންނަށާއި މުޅި މުޖުތަމައުއަށް ވަރަށް މުހިންމު ކަމެއް ކަމަށެވެ.
ރިސޯޓުގެ އެޗްއާރު ޑިރެކްޓަރު ރިފްއަތު ފަރީދު ވިދާޅުވީ މިފަދަ ހަރަކާތްތަކުގައި ރަށުގެ ހުނަރުވެރިން ބައިވެރިކުރުވުމަކީ މެހުމާނުންނަށާއި މުޅި މުޖުތަމަޢުއަށް ފައިދާހުރި ކަމެއް ކަމަށެވެ.
މި ހަފްލާގައި ހޯދުނު އާމްދަނީ ހަދިޔާކުރެވޭނީ މަޑުއްވަރީ ޗެރިޓީތަކަށް ކަމަށް ރިސޯޓުން ބުނެފައިވެއެވެ. އަދި ކުރިއަށް އޮތްތަނުގައި ވެސް މިފަދަ ގިނަ ހަރަކާތްތަކެއް ރާވާފައިވާ ކަމަށް ރިސޯޓުން މައުލޫމާތުދީފައިވެއެވެ.
