މި އޮޕަރޭޝަނަކީ ގަވާއިދާ ހިލާފަށް ދިވެހިރާއްޖޭގައި ދިރިއުޅޭ އަދި މަސައްކަތްކުރާ ބިދޭސީން ހޯދުމަށް ކުރިއަށްގެންދާ މަސައްކަތެއްކަމަށް އިމިގްރޭޝަން އޮތޯރިޓީން މަޢުލޫމާތު ދީފައިވެއެވެ.
މި އިންސްޕެކްޝަންގައި އިމިގްރޭޝަންގެ ގިނަ އޮފިސަރުންގެ އިތުރުން އެހެން ސަރުކާރުގެ މުއައްސަސާތަކުން ވެސް ބައިވެރިވާކަން ފާހަގަކުރެވެއެވެ. މީގެ ތެރޭގައި މޯލްޑިވްސް ޕޮލިސް ސަރވިސް، މިނިސްޓްރީ އޮފް އެކޮނޮމިކް ޑިވެލޮޕްމަންޓް، ހެލްތް ޕްރޮޓެކްޝަން އެޖެންސީ އަދި މޯލްޑިވްސް ފުޑް އެންޑް ޑްރަގް އޮތޯރިޓީ ހިމެނެއެވެ.
ހުޅުމާލޭގެ ހުރިހާ ސަރަހައްދެއް ބަލައި ފާސްކުރުމަށް ރޭވިފައިވާ މި އޮޕަރޭޝަނަކީ، ކުރިން މާލޭގައި ހިންގުނު މިފަދަ އޮޕަރޭޝަނެއްގެ ފަހުން ކުރިއަށްގެންދެވޭ އެންމެ ބޮޑު އިންސްޕެކްޝަން ކަމުގައި ބެލެވެއެވެ. ކުރިން މާލޭގައި ހިންގުނު އޮޕަރޭޝަނުގައި ގިނަ އަދަދެއްގެ ބިދޭސީން ހައްޔަރުކުރެވި، ގަވާއިދާ ޚިހިލާފަށް ހިންގަމުންދިޔަ ވިޔަފާރިތަކެއް ބަންދުކުރެވުނެވެ.
މި އޮޕަރޭޝަނުގެ ސަބަބުން ހުޅުމާލޭގައި ދިރިއުޅޭ ރައްޔިތުންނަށް ވަގުތީ ދަތިތަކެއް ކުރިމަތިވެދާނެ ކަމަށް ބެލެވޭއިރު، އިމިގްރޭޝަނުން ވަނީ ރައްޔިތުންގެ އެއްބާރުލުން އެދިފައެވެ. މި އޮޕަރޭޝަނުގެ ނަތީޖާ އާންމުކުރާނެ ކަމަށް އިމިގްރޭޝަނުން ބުނެއެވެ.
