ސްޕެނިޝް ލީގުގައި ހަތް މެޗުން މޮޅުވުމަށްފަހު، ބާސެލޯނާ ބަލިވީ ރަށުން ބޭރުގައި އޮސަސޫނާ އަތުން ހަތަރު ލަނޑު ދެ ލަނޑުންނެވެ. ރޭގެ މެޗުގެ ފުރަތަމަ ހާފުގައި އޮސަސޫނާ އިން ވަނީ ދެ ލަނޑު ޖަހައިފަ އެވެ. ދެ ވަނަ ހާފު ފަށައިގެން އަށް މިނެޓުގައި ބާސެލޯނާ އިން ލަނޑެއް ޖަހައި ފަރަގު ކުޑަ ކުރި އެވެ. ނަމަވެސް، މެޗުގެ 72 ވަނަ މިނެޓުގައި ލިބުނު ޕެނަލްޓީ ކާމިޔާބުކޮށް ބުޑިމީރް ވަނީ އޮސަސޫނާގެ ތިން ވަނަ ލަނޑު ޖަހައިފަ އެވެ. އަދި 85 ވަނަ މިނެޓުގައި އެ ޓީމުގެ ހަތަރު ވަނަ ލަނޑު ޖަހައިފަ އެވެ. މެޗުގައި ބާސެލޯނާގެ ދެ ވަނަ ލަނޑު 89 ވަނަ މިނެޓުގައި ޖެހީ ލަމީން ޔަމާލް އެވެ.
މިއީ ބާސެލޯނާގެ ކޯޗުކަމާ ހަވާލުވި ހަންސީ ފްލިކްގެ އިރުޝާދުގެ ދަށުން ސްޕެނިޝް ލީގުގައި އެ ޓީމު ބަލިވި ފުރަތަމަ މެޗެވެ. މެޗުން ބަލިވި ނަމަވެސް، އެއް ވަނައިގައި ބާސެލޯނާ އޮތީ ހަތަރު ޕޮއިންޓުގެ ފަރަގަކާއެކުއެވެ.
