ޝަންމާން މިހެން ވިދާޅުވީ، ގަވައިދާ ހިލާފަށް އުޅޭ ބިދޭސީން ހޯދުމަށް އިމިގްރޭޝަނުން ސިލްސިލާކޮށް ހިންގާ ހަރަކާތްތަކުގެ ތެރެއިން، އެފަދަ ދެ ވަނަ ބޮޑު އިންސްޕެކްޝަން މިއަދު ހުޅުމާލޭގައި ފެށުމުގެ ކުރިން ނޫސްވެރިންނާ ވާހަކަ ދައްކަވަމުންނެވެ.
ޝަމްއާން ވިދާޅުވީ ބިދޭސީންގެ މައްސަލަ ހައްލުކުރުމަށް ކުރިއަށް ގެންދެވޭ މަސައްކަތުން ވަރަށް ރަނގަޅު ނަތީޖާއެއް ފެންނަމުންދާކަމަށެވެ. އެގޮތުން މާލޭގައި ކުރިއަށް ގެންދިޔަ އިންސްޕެކްޝަންތަކުން ގަވާއިދުގެ ތެރެއަށް ވަނުމަށް ނޯޓިސްދިން މީހުންގެ 95 އިންސައްތަ މީހުން އެ އޮފީހަށް ހާޒިރުވިކަން ޝައްމާން ފާހަގަކުރެއްވި އެވެ.
ޝައްމާން ވިދާޅުވީ އެ މީހުންގެ ތެރެއިން ލިޔެކިޔުންތައް ރަނގަޅުކުރުމާއި ވިސާ ރަނގަޅު ކުރުމަށް ބޭނުންވި މީހުންގެ ވިސާ ރަނގަޅުކޮށްދީފައިވާނެކަމަށެވެ. ޝައްމާން ވިދާޅުވީ މި ކުރެވޭ މަސައްކަތުން ބިދޭސީން ގެންގުޅޭ ފަރާތްްތަކާއި އަދި ބިދޭސީ މަސައްކަތްތެރިންވެސް ގާވާއިދުގެ ތެރެއަށް ވަނުމަށް މަސައްކަތް ކުރަމުންދާ މަންޒަރު ފެންނަމުންދާކަމަށެވެ.
ގަވާއިދާ ހިލާފަށް ވިޔަފާރިކޮށް، ސައްހަ ވިސާއެއް ނެތި އުޅެމުންދާ ބިދޭސީން ބަލައި ފާސްކުރުމަށް ކުރިއަށް ގެންދާ މި އިންސްޕެކްޝަންގައި ހުޅުމާލޭގެ ފޭސް އެކެއް އަދި ދޭއް ހިމެނޭހެން 27 ޒޯނެއް ބަލައި ފާސްކުރުމަށް ހަމަޖެހިފައިވާ ކަމަށް އިމިގްރޭޝަނުން ބުނެ އެވެ.
މި ހަރަކާތުގެ މަގުސަދަކީ ދީފައިވާ ހުއްދައިގެ ބޭރުން ރާއްޖޭގައި އުޅެމުން އަންނަ ބިދޭސީންނާއި ގަވާއިދާ ހިލާފަށް ކުދި އަދި މެދު ފަންތީގެ ވިޔަފާރި ކުރަމުން އަންނަ ބިދޭސީން ދެނެގަނެ، އެފަރާތްތަކަށް އިމިގްރޭޝަނަށް ހާޒިރުވުމަށް އަންގައި، އަދި މިފަދަ ބިދޭސީން ލައްވައި މަސައްކަތްކުރުވާ ދިވެހިންނަށް ލިޔުމުން ނަސޭހަތްދިނުން ކަމަށް އިމިގްރޭޝަނުން މައުލޫމާތުދެ އެވެ.
މި ސަރުކާރުން ތިން އަހަރުތެރޭ އެ މައްސަލަ ހައްލުކުރުމަށް އަމާޒު ހިފާފައިވާއިރު، ހޯމް މިނިސްޓްރީން އަންނަނީ ރާއްޖޭގައި އުޅޭ ބިދޭސީންގެ ދަފްތަރެއް އެކުލަވާލަމުންނެވެ. އެގޮތުން "ކުރަނގި އޮޕަރޭޝަން"ގެ ނަމުގައި ބިދޭސީންގެ ބަޔޯމެޓްރިކް ޑޭޓާ އެއްކުރުމުގެ މަސައްކަތް ކުރަމުން އެބަދެއެވެ.
އިމިގްރޭޝަނުން ބުނެފައިވާ ގޮތުގައި މިދިޔަ އަހަރުގެ ނޮވެމްބަރު 17 އިން ފެށިގެން މިހާތަނަށް 4،054 އަށް ވުރެ ގިނަ ބިދޭސީން ޑީޕޯޓްކޮށްފައިވެ އެވެ.
